...........
سيد طاهر
............
أبلة فاتن - بقلم وريشة: سيد طاهر
أبله فاتن إزيك …؟ وحشتيني ،، أنا الولد الشقي .. تلته أول (الفنان الصغير ) أيوه حضرتك كنتي مسمياني كده ..معاكي حق تنسي ماهو فات سنين كتيير وأنا كبرت وشعري شاب وطلعت عالمعاش … لكن إنت لسه جميله وحلوه وعيونك السود لسه بتبرق ..فاكره لما كنتي بتعلميني الرسم ..؟ أنا لسه فاكر لون أظافرك وإنتي بتصححيلي رسمي ولون شفايفك نفس لون ضوافرك لسه فاكر شذى عطرك انتي فاكره ولا نسيتي ؟ معاكي حق تنسي ماهو فات سنين كتير… لكن أنا لسه فاكر .. عارفه ليه وما تزعليش مني … أنا كنت بحبك .. أيوه والله كنت بحبك وكنت أحياناً وربنا يسامحني كنت أتعمد الخطأ في رسمي علشان تصححيلي .. وشوف عيونك من قريب ويلمس شعرك الناعم وجهي وأنا جالس على التخته في حصة الفنيه … افتكرتي ..؟! طبعاً ..لأ. . معاكي حق ماهو فات سنين كتير وأنا شعري شاب لكن إنتي لأ ..لسه صوتك بيرن في وداني لما كنتي بتحكي قصص من خيالك ونختار منها المشهد اللي نرسمه… كنا كلنا بنحبك وننتظر يوم الأربع عشان حصة أبله فاتن مدرسة الفنيه .. لكن أنا كنت بحب الرسم عشان بحبك .. سامحيني يا فاتنة قلبي الصغير من سنيين أنا شبت وإنت لسه شابه وجميله … تلميذك الشقي -الفنان الصغير❤️
ليست هناك تعليقات:
إرسال تعليق