................
صداح فى بلاد غريبة
.............
هيا نبتسم قليلا مع الزجل الحلمنتيشى الذى كتبته فى لحظات روقان ؛ وكل عام وانتم بخير •
•••••••••••••••••( أكلة كوارع ) •••••••••••
قالى ياناس بكره راجع
وف إيده أكلة كوارع
استنيته على البلكونة
وقت الغدا باصوصو وجائع
لقيته جاى من بعيد
وشايل كيس أصفر وفاقع
شاورت ليه أوام تعال
راح بسرعة للشقة طالع
دخل وساب اللى ف إيديه
جنب حلويات وساقع
كنت جايبهم عشان مانهضم
الأكل اللى يفرقع مدافع
رحت فتحت الكيس والاقى
فلافل وبطاطس صوابع
قمت مصرخ بغيظ ف صاحبى
وصوتى جاب لأخرتها شارع
لاقيته قرب يااخويا منى
وعلى وشى ميل وطابع
بوسه يمكن اسكت واهدى
بس ازاى وقلبى والع
وفجأة الناس اتلموا عندى
ولقيت بيتى كأنه جامع
وكان معاهم جارنا اللئيم
اللى كان متسنط وسامع
فشرحت ليهم الحكاية
ومافعله هذا الملاوع فتحوا الكيس شافوا الفلافل
نزلوا عليها بالتدافع
كأنهم دبان بيشغى
أضربهم أبدا مانافع
وبعد ثوانى مالقيتش حاجة
غير كيس فاضى وناصع
قام قرب لى شاب منهم
تخين قلبوظ وطوله فارع
بيمشى ويتكلم بصعوبة
أما فى الزلط واللهط بارع
قال الفلافل مية مية
بس الزيت شوية لاذع
وشاب تانى جه يكلمنى
شكله كان أهبل ولاسع
قالى ياعمى فين الغموس
فغظنى أسلوبه اللى مايع
رحت حادفه بزهرية جانبى
جت ف وش الواد مطاوع
صرخ من شدة آلامه
راح بعديها ع الأرض واقع
جرينا وقومناه بالعافية
قام معانا وخده دامع
بعديها راحوا غسلوا ايدهم
وجم قعدوا زى الضفادع
اللى يعفر واللى يغنى
واللى يهزر أكمنه شابع
واللى يمزمز مابين سنانه
ويقولى الله الأكل رائع
جيت قولتلهم شرفتونا
يلاه باتوا مكانا واسع
وانت ياجدو غير هدومك
بالله عليك لانت قالع
قالوا ليا شكرا ياايمن
حانسيبك وحنطلع للسابع
أصل احنا سامعين زعيق
تعال لو ماعندكش مانع
قولتلهم ألفين سلامة
تعالوا بكرة أكلة كوارع
~~~~~~~~~~~~~~
الأديب الشاعر
ايمن عزالدين سكورى
من مدونتى
صداح فى بلاد غريبة
ليست هناك تعليقات:
إرسال تعليق