ديوان أكاليل الإلكتروني لسفراء القلم

..............

محمد عبد النعيم

.........

مهما....

******

مهما دقت

على راسك

طبول...

لا تطاطي ليها

ولا تنخ ...

ومهما حطت

على كتافك

حمول..

خليك صبور

ولا تستنى عون

من صديق

واللا أخ..

ومهما هاجت عليك

خيول ..

لا تكاكي ولا تتخ..

ودراعك خليه متين

ووقت الحنان والحنين

خليه يلين ...

ولا يقسا ولايشتد..

ووقت الجد يناكف

ويمتد لأبعد حد..

وعنك يصد..

وصوابعه للحق

تدوس ع الزناد

وتطخ ..

وإذا هبت عليك

الخماسين ..

عنها ميل فلا

تعافر مع الزعابيب

ولا تنفخ ولا تكح

وفي كل خطاويك

امشي حذر

ونبيه برجليك

ليلهفك في الطريق

من غير ما تدرى

فخ ..

ولا تغل إيدك

عن نفسك وبيتك

ولا تخليها تسح

باللي فيها

سح...

ولاتآمن لخسيس

واطي..

مهما ليك

يطاطي

ومهما قدامك

نخ ..

لويملكك يوم

ينتزع روحك

بغدره وخسته

نزع ..

ويخلى دمك

منك يسيل..

وينزح جرادل منه

نزح ..

ومها كنت صاحي

وواعي وغويض

جوه الجحور تعابين

وعقارب جوه الشق

تسري كما الميه

تحت التبن

وتبخ سمها فيك

وحواليك بخ..

ومين يحفظك

من الناس ونفسك

في سكتك

غير ربنا الحق

هو السند ليك

في خطوتك

والمعين

وقول للشياطين

مهما غووك وخدووك

من سكة ربنا

وصراطه المستقيم

لأ..

محمد عبد النعيم

٢٠٢٠/٨/٨م