..............
فتحى نجم المنصورة
...............
آسف ياصاحبي : مدونة على يوميات قلم عاشق
::::::::::::::::::::::::::
جسر الحبال اتقطع
والوصل كان نساي
زمن الغناوي وقع
والهلس رايح جاي
كان في زمان الصداقة
تتاقل بالياقوت والمال
الوقتي نصوم ع البصل
والحال بقي غير الحال
زميل تخته زميل ُشُقرف
حبيب ليا من وحنا صغار
دا واد رايق مهوش مقرف
عليا دايما كان غيّار
يشوفني نصيحته سباقة
عايزني أفلح في تعليمي
يقول ذاكر وانا بدالك
يحش بشقرفه برسيمي
ويعمل شاي ويديني
يلف الجسر بدل مني
ويروي الأرض ويرضيني
ويفرض فرض
أدخل المعهد الديني
ويشيل عني كتير في الغيط
يزامل بدل مني بطيب خاطر
وينصحني إذا طبيت
ويعطس عني إذا استهويت
وإذا اتكلمت بصوت عادي
يقول غنيت
ولا عمره كان في يوم حويط
دا كان همام ولد شاطر
ويسعدلي إذا اتوضيت
ودعواته لرب البيت
يصلح حالي ويهدي لي
كتابي وقلمي وفاسي
ولا عمره كان ولد آسي
يجيب لي قميص وكم كراس
وجزمة يا دوب بنعل قديم
رباطها متين
ويفرد وشه بضحكاية
ويقولي بكعب نحاس
يقول قيمة في وسط الناس
علي قدي
أشيلك علي أعالي الراس
واعمل من خدودي مداس
منا قبل سابق قلت لك
إنت العلام وأنا بالفاس
ولما تتخرج وتعلا متنساشي
إن ليك صاحب
مقامة بسيط أكيد عنك
لا انا أخوك ولا ابن عمك
لكن حاسس إني من دمك
ف متتعالاش وسلم
وخدني جوا أحضانك
وافتكر إني سهمت
في جزء من طموحاتك وأحلامك
ولا تعاير في يوم فقري لو إغتنيت
ولا تتريق علي جسمي إذا ابتليت
وصلي عليا يوم موتي
وخلي دموعك توضيني
وقول دا كان في يوم صاحبي
وكان لي حبيب
وكان هو دوا عيني
وريحة الطيب
وكان يِحرم نفسه ساعات
يغديني ويعشيني
وهدمتة هي اللي كانت
في يوم ستراني وتكسيني
يااااه منك ياالفراق
هاتفضل ملازمني
ولا تقضيني دموع عيني
والفؤاد تنشف ملامحه والخضار
بعد عوده مااتقصف ملناش خيار
غير دعوتي وسلامي ليك
يااللي كنت دايما
علي راسي وقدامي فخر وفخار
فا انا اسف لنسياني
بعدني الزمن عنك
لكني من غيرك ياصاحبي ب عاني
ولا تساوي الدنيا بعدك شيء
ماهو انت القصر
وانا يادوب صورة في البرواز
الدنيا لو معدول حالها
يبقي انت حبة الرملة
اللي كونوني إزاز
أيوا إنت الأصل
وانا بعضك ياأغلي الناس
وكل تكويني
بقلم /فتحى نجم المنصورة
مساء الجمعه 27/12/2019
ليست هناك تعليقات:
إرسال تعليق