..................
مغاوري كروش
............
حدوته ملتوته
************
بقلمي / مغاوري كروش
********************
دايما باحلم
لما بنام واتغطي
واكون دفيان
باحلم بامي وابويا
وجارنا
عم زيدان
كان يقابلني وهو بيضحك
واما ينهنه
كان بينهنه فيه انسان
واما بانام مكشوف عريان
عيني تشوف
الحلم كابوس
رجله تدوس
من فوق الروس
رجله تدوس
علي كل الخلق
وزي البرق يتوه العقل
مابين الشرق وبين الغرب
ويخليني اطير ع الصين
وبلاد الهند
ويرجعني ف لحظه
بلاد المستر بوند
واما احاول مره اعانده
مابينفعش معاه العند
فاسترخيت
واستسلمت لايده تشيلني
وتسرسبني
جوه سحابه
رخت ميه
فوق راس غابه
فاترخيت
علي خيط في الميه
واتقلبت
في حضن سريري
يمكن اتوه م الحلم شويه
فلقيت نفسي في وسط الخيه
شفت بعيني وحوش في الغابه
عامله عصابه
مستنيه نزولي بحرقه
البرتيته
واللقيطه
والنطيطه
وكل الفرقه
وانا قدامهم
كنت فريسه
في قلب الهيصه
وباكل علقه
مانا في التو ونفس اللحظه
كل ارادتي انسرقت مني
وانا في الزنقه
كل وحوش الغابه اهتموا
وصغيرهم قبل كبيرهم
جم واتلموا
وقفوا طابور
واللي بيجي عليه الدور
يسأل نفس سؤال الاول
ايه اقوالك يامغرور
قول ماتخافشي
ولاتكدبشي
مالك واقف كده مرعوش
احنا صحيح
في الصوره وحوش
من غير ريشه
ولون منقوش
حتي الهدمه
في وقت الخدمه
الديل مذعور
ودراع مقطوش
لو حانجيب
الدور م الآخر
تبقي صورتنا
عاوزه رتوش
لكن نرضي بكل العيشه
لو فروتنا تكون الخيشه
بس اللي احنا
مانقبلهوش
بس اللي احنا مانعملهوش
اسأل عنه مغاوري كروش
وانزقيت
م الحلم بقوه
بعد مادقت الكلمه المره
قالوا ياإنسي
اطلع بره
روح لبلادك
وولاد جنسك
والله مافيكم
الا لسان
واوعي تنام في سريرك مره
كاشف نفسك
او عريان
ليست هناك تعليقات:
إرسال تعليق