..................
اشرف الشناوى
..................
......وكان نفسى........
ولا عاوز اكونلك غير
شجر يكتر
فى حضنه الطير
وتملا غيطانك الخضره
غنا وازهار
واكون توته تمد فروعها
فوق سطحك تغطى الدار
وترمى فى توتها
يتلموا عليها صغار
وحدوته بنسمعها
على الاوتار
وليل صافى لبن طازه
وفل يغنى فى الفاظه
وسبحه تعد
مية حبه بتشهيده
وتكعيبة عنب طارحه
وبنت تلف فى الطرحه
عيون مليانه بالفرحه
وتغريده
ونيل ينزل بمجدافه
يغطى خدودك السمره
بكاس خمره
وتملا غيطانك القمره
بتعميره
وصبح يدق فى اوتاده
ويسنكر عالغرام بابه
ويظغط م الحمام
زغاليل
وكان نفسى اكون
شالك وخلخالك
وحلم جميل
واهز فى قلبى واستنى
واحس بقلبى لو غنا
وقال مواويل
بحبك زى ماتكونى
واحطك رمش لعيونى
واغطيبك هوى قلبى
وهو عليل
وكان نفسى اكون ذاتك
واكون غيطك
واكون بيتك
واكون قنديل
ينور لك لياليكى
ويكتب لك غناويكى
فى عز الليل
ولا عاوز اكونلك
غير .......................
اشرف الشناوى
شاعر عاميه
المنصوره
البرامون
ليست هناك تعليقات:
إرسال تعليق