..................
العابد عبد الرحيم
..................
/ تكهنات شوافة
-------------------/
(قارئة الفنجان)
( الشوافة باوراق اللعب=الكارطة=)
( صورة من الواقع جامع لفان مراكش)
(زجل)
ضربت الكف على الكف.!
تمتمت باصدرها اتفافي.!
حلفت قالت ها طريقك..!
قالت :
ها طريق النف
ها طريق الدف
ها طريق الخير
ها طريق.. الشر
* ها طريق لمحاين بلا محنة مكتوبة.!
ارضعتي بزولة لحلال
عدتي راجل من ارجال
قانع ما همك جاه امرك سيدي حيرني.!
البيت اللٌي في قلبك ساكنو روحاني.!
فيه اكبرتي فيه اتربيتي فيه عشتي.!
ها طريق الخير مغروسة احرير
ها طريق الشر مغروسة اشوااك
انقول لك استرني حسي مسي
صورتك مدفونة في قبر منسي
يمكن ثلث خطوات
يمكن يمكن ثلث ايام
يمكن مشية مشيةعام
فابلاد خالية و ابعيدة
امخينزة و ااالفاسوخ
من عطار بابو اخضر
فكاك لوحايل و الشدة
داخلة بالسوطة تلعب
خارجة بالراي مغلوبة
مغلوب على امرك سرك حيرني!
انا امعاك مولات الشد لخضر.!
قالت منانة اتمن عليك والجود.!
انت اعريس بلا عروسة
عنذك فلوس...بلا فلوس
رزقك في ابلاد ابعيدة
خمم فكر اجبد كثر لفتوح
عفريتهم عفريت سليماني
الماجية جاية بلا جنحين
لا تشطن بالك واتكثر هبالك
العاطي الله ايجود غير حضر النية
العاطي الله ايجود والشوافة سبب
افلوسك جاية في خشنة حقي فيها كمشة.!
خليني نجدب واجدب احدايا جدبة معلومة.!
* الطابلة و المخزن و الكرسي أو لكلام كلامك !
* كتافك واسعة واعريضة و اللبسة لبسة والي.!
* صباحك الخير يا المير ليك النجوم اتبايع.!
لا تسول لا اتسال طريقك بعيدة
ايقربها ميمون مول سعد السعود
طريقك طريق المخزن باكراسيها
غدا تحكم والكلمة منك مسموعة
حاشا مول الزين واش ايخيب.!
عندك حساد
تابعاك
لعيون والسحر
وحدة من اثنين الثالثة اختارها
ها سعدك ها مكتوبك هذاك ظنك
يدك على قلبك و النية حاضرة
لفتوح لفتوح لا يمشيوا اجوادي.!
مول الكبيرة دارو اكبيرة عامرة.!
مول الصغيرة امقزب ايشوف
دارو فارغة لا عولة لا فراش
كرطيط جيبو جيب خاوي.!
لا اذهب لا صوف
لا تحلم باهتوف
* العاطي أعطى معطاه العبد الداه.!
* الزين ابحالك ما يستاهل محنة.!
* الذهب لداوير الزمان خزنو ينفع.!
( من المحال يا لمخاطبني)
* الخير جاي ،الزهر جاي امتابعين.!
هذا مبلي بلكلام ااو لمعاني
هذا مبلي بخفة اليد سراقة
معروف في سوقنا اعرفناه
الى فاتك لكلام قل ااسمعت
الى فاتك الطعام قل اشبعت
حط يدك على قلبك ااو قول
*ها زهري ها سعدي
ها اللٌي اعطاني الله.!
شوف ابعيد بالعين امغمضة.!
اهاي اهاي التعميرة باتاي
بالنحاس و اااللٌا بالفضة
* تعميرة الصينية الزنبيل امزوقها.!
تعميرة اضياف من الحب
تعميرة لحباب كلها لمعزة
سرتي ولد النخوة والرضا
على سلامتك يااا ولد العز
اسخونة من فم الغلاي
احلوة من.......فم البراد
كيسانها كيساان البلار
اشرب أو ذوق لحلاوة
لاعبين حثى يصبح الحال.!
فينا الرابحة فينا الخاسرة.!
* احمق و اهبيل او عقلو معاه.!
* احمق واهبيل حاضي اجنابو.!
اللي قرسو حنش
ايخاف من لحبل
مرضي الوالدين
لا اتخاف لا تتهول
جاياك ليام الزينة
الركنية ركنة البيت يا عزيزة
دكة اتاي دكة من ااالرابحين
شهد او عسل من فم البراد
يا ريق النحل را لعسل ابلاني
*راك ابلادي و عليك اايموتوا الرجال.!
قالت الشوافة واصدق كلامها خاوي.!
انا مالي اانا مالي خليوا لكلام ينبت.!
الحكمة فالزريعة زرعوها بينكم خير.!
اعطيوها الحنة والريحان
بخروا بالجاوي أو صلبان
زين للوان لون نيلي زاهي
جدبي جدبي مع عيساوة
اش اخبار الزين فالصباح؟
*جدبي جدبي حثى ايكمل الله المراد.!
لكتاف اعراض شارات المخزن.!
القلدة و النخوة في دار البااشا.!
انا كنت ابزهري واتلف
ما القيتو يا جامع لفنا
من حلقة الحلقة نتسارى وعيوني قابة.!
يا الشوافة ماشفت ما ريت.!
غير لخوى و الخاوي علمني.!
((صورة حية من واقعنا المعاش الشوافة نموذج))
( قارئة الفنجان الحب هو المكتوب عليك..الخ)
العابد عبد الرحيم : 04/10/2021
ملهمتي الفقيه بن صالح حرف قلم و ورق
ليست هناك تعليقات:
إرسال تعليق