...............
الادريسي محمد
..............
قصيدة. ( عش النحل )
منين ندخلك يا قلبي
وباش من ساروت نحل
الزحام على بابك
نخلة انت فيها عش نحل
ولي تبغيه ياغلبي
ناره فدخالك تشعل
الرضاب منك يا قلبي
رغوة سايله عسل
كلامه فيك ساكن
كي تسمعه تبدى تسعل
ولون خدودك يا قلبي
تتورد من كترة لخجل
فمكانك تدور يا قلبي
رحى فشعيرها تغزل
صافي طاهر يا قلبي
روحو سبحان من صفاها
رماك زينها يا قلبي
وعشقها فيك من سواها
واش المعمول يا ربي
والقلب معلق فهواها
الى غابت يركبني جني
نصيح فدخالي مقساها
قلولها غير تولي
ما نعرف نجاري خطاها
تحن وترئف بقلبي
نكون ظهرها وحماها
الغيرة تخرم فجنبي
نبرى بشمس ضحاها
ولا زارتني في دربي
توقف الحركة ومشاها
والشرق يرجع غربي
بطلت الزين وبهاها
قلولها لا ترحل
الحومة خايبة فخلاها
بلا بيها كي عصات الطبل
طويلة مقوسة من علاها
والخيل لي ركبه يفشل
وخيل شوقي فربواها
يركض والطلوع جبل
يتمنى يوصل لرجاها
ما يهمو سقوط الثل
ولا همه غير رضاها
الرضى فعيونها يقتل
ربي يرحم من رباها
لا تلومو كل معتل
لهلا يبليكم ببلاها
29. 06. 2020.
الادريسي محمد
ليست هناك تعليقات:
إرسال تعليق