................
ادهم السمهودي
................
ازقيني يا واد عمي عطشان
من طول السفر الريق نشفان
كل مره تيجي تزقيني
فثواني ارجع تاني عطشان
عطشان دفا وحنان
عطشان من فرقه الحبان
امي وابوي والخلان
ناسي وأهلي والجيران
عطشنا مش زاد ولا ميه
عطشنا والله حنيه
من برد الشتا اللي بيلسع فيا
وكل م ادور على حضن دافي
ارجع حزين ومش لاقي
وفي الاخر اتلف في بطنيه
ازقيني يا واد عمي تاني
وادلق الميه على راسي
يمكن افوق من جناني
واحلى مر كاسي
انا اللي محدش رباني
خلعت جلباب ناسي
جلباب العزه والطيبه
والشال ومسكه العصايا
ودلعي انا وصغيّر
وحشتني ايام صبايا
والعمر كبر وتغيّر
كبرنا وبنلف في ساقيه
والقلب من صغره عجّز
وفلوس الغربه مارقه
قبل م اقبُض افلّس
فلوسها ورق كوتشينه
و مفيهاش ولد يِقِش
للغربه من تاني جينا
وومعناش ولا قرش
ازقيني يا واد عمي يمكن افوق
وقولي غربتك يا صاحبي عيب
واعيش شبابي قبل م اموت
قبل ميظهر في راسي الشيب
عايز افضفضلك يخوي واروق
و احكيلك عن عشه العزوبيه
والله يا خوي انا مخنوق
من صحيه الشقا قبل الفجريه
وارجع لسكني مهدود
وافكر في عشاي
ويدوب اغسل هدومي
واحس سريري بيناديني
من النوم اللي كابس على عيني
واقوله جايلك يا سريري جاي
امتى ياربي لبلادنا نعود
ونحمدك على كبايه شاي
ازقيني يا واد عمي عطشان
ازقيني يا واد عمي عطشان
رباعيات الدهمان
شاعر العاميه
ادهم السمهودي
ليست هناك تعليقات:
إرسال تعليق