................
مصطفى كرم
...............
**** سفينة الحياة ****
سفينة الحياة مش ماشية ليه
علي بعضها
شوية شمال وشوية يمين
وشوية تجيبنا بأرضها
زى السكران..... عايش توهان
مش داري طولها من عرضها
يا سفينة دوارة ديما غدارة
إزاي ترمينا وقلوبنا حيارى
نشرب من ويل يهد الحيل
تضحكي وتقولي والله شطارة
أنا فارد شراعك في وش الريح
معرفش لا غش ولا تلويح
وعيبي كنت معاك صريح
ملقتش منك غير تجريح
رويتي ليه بالحزن جوفي
زرعتي جوايا قلقي وخوفي
ولا حتى تقدري مرة ظروفي
هفضل لأمتى فيكي جريح
مسكت مجدافك أجدف
أعدي بيكي بحور وانهار
بحلم اشوف النور طريقي
وأوصل بيه آخر المشوار
زعلانة منى اكمني
نفسى أشوف صحاريك عمار
مية إيد ماسكة الدفة
والكل بيفتي و بخفة
كأن الميتم بقي زفة
قلبوا حياتنا عذاب مرار
لا عارف أبني فيكي حلمي
ولا حتى عارف أشتكي همي
وكل واحد أجرى عليه
يقول يا عم سيبني في همي
الكل ملهى عشان يعيش
يجري ويتعب لأجل العيش
وطوق النجاة أصبح مفيش
لأن قانونك يحيا التهبيش
طيب أعمل إيه وأنا غلبان
ونفسي أخرج من التوهان
وأحس يوم إني إنسان
وترحميني بقا من التلطيش
**************************
بقلم / مصطفى كرم
ليست هناك تعليقات:
إرسال تعليق