ديوان أكاليل الإلكتروني لسفراء القلم

 ..................

بنباحفة ياسين

..............

اه يا البحر..

شحال ديتي ما شبعتي..

شبان صغار ما رحمتي..

هلكتيهم أو لشط لحتي..

ضميتهم يا البارد جمدتي..

اه يا البحر..

جاوك مغامرين..

برواحهم مقمرين..

خلاو الوالدين..

الميمة القلب الحنين..

البو لي رباهم سنين..

اه يا البحر..

داقت دنيا و جاوك..

داقت دنيا و بغاوك..

يديروك طريق يقطعوك..

لبلاد الغربة يشقوك..

اه يا البحر..

بمواجك عساس..

لحلامهم هدمتي ساس..

دربتي بلا إحساس..

سكتي القلب و لأنفاس..

اه يا البحر..

كو سمعتي..

دموع الميمات..

حزنهم على لي مات..

عمرو فحضنهم يبات..

اه يا البحر..

كلك قصوى و غضر..

بقلم بنباحفة ياسين