..................
أحمد الكندودي
...............
***لا تحكم
لا تحكم....
على الخلق بالباطل ولوضعو تفهم
فالشكوة بلا ساعد ما تمخض
ؤم تعطي لبن ؤ لا سمن
ما يركب لخوى منطوقك
بالرزانة والحكمة ستر عيوبك
صفي الحَب من الخش والتبن
م تكون للجماعة كَاعة
محبة لبهوت طير ف ساعة
أو مطمورة حناشها...
تنفث الشر والسم
أو في سلة وحدة تجمع الصفا
وبناب لغدر تعض لوفا
ؤ تمسخ بجلايلو لعفن
لا تحكم ...
فالغايب حجتو معاه
بدعاوي لخير تسناه
م تسمع للقيل بو ودينة مدندن
ناس حال ؤ أحوال
م تلوم حد لحظ جف ؤ ثقال
م تحكر فيه ؤ م تكثر سؤال
ؤ على قول الزور لا تبصم
تولي فليل الشان مريض محقار
تابع مسلوب لسانو ضر مشرار
م يحس بالغير يْخاف م يحشم
م تدير القيل حلقة في ودنيك
م تقيس بضرك لمحبة...
را حرها يتقلب عليك
غدا م تنفعك حسرة ؤما يفيدك ندم
لا تظلم بنادم ل تزيد jتْررًبْ عليه
يشغل صبرو نار ؤم تقدر تطفيه
ؤ من جناح جهالة حط رجليك...
شد الأرض ؤ خمم
كون إبرة لا تكون خيط
يديروك معبر ممر ؤ حيط
ؤ ف زمان لحسد ؤبلا بلا ...
بردوك بوط مصنن
لا تحكم
***المغرب***|لشاعر والزجال: أحمد الكندودي***
ليست هناك تعليقات:
إرسال تعليق