...............
.........
زجلية مغربية ....
الدم المدبوح عمر سواكي
خلاني نندب حناكي
يا لحبيب سرجوك لقوافي
حطوك في الرحى بلعوافي
حربلوك في الكانون الوافي
غربلوك ف شطاط الشعير
غمسوك ف زيت النعير
حنطوك بفاسوخ زعير
كفنوك ف ثوب حرير
مشطو هيدورتك للغير
عاداوني وجبروني على رحيل
كانون طفى وطار رمادو
جمعت حفنة منو كحلت في ليل مظلام
مايشوفوني نتزين ليك في لغمام
حطيت شوية لعكر الفاسي
حطيت الحنة في راسي
غزلت شال حرير حتى طار نعاسي
وما قدرت نطوع قلبي ونخليك ناسي
أنت مالكني من راسي لساسي
تمرغت في دموعي ورموشي
توحشت ديك الزاوية العالية
توحشت سرب لحمام في لغمام
و سحابة تنقش حبنا للدوام
خلات ريقنا معلق للتحنان
ورواحنا تتعانق كلما يهلل الهلال
عمري نسبيك ولا نخلي واحدة تديك
ساعتها نوض حرب عليها وعليك
ليست هناك تعليقات:
إرسال تعليق