..................
أدهم السمهودي
.............
قصيدة بعنوان (كفنونا)
كفنونا
وادفنونا
وتحت بيوتنا ارمونا
كفنونا بكل برود
من قوانينكم مت مشنوق
واوعاكم تسيبونا أحياء
بعد متهدموا البيوت
ياك فاكرينا يا ناس عايشين
داحنا موتنا من سنين
من الكهربا اللي زادت
ولا من غلو الفواتير
كفنونا
وادفنونا
ولو فضلنا عايشين
من تاني اشنقونا
اشنقونا بكل قساوه
ومن ازهركم اصدروا فتاوه
اطاعه إولي الامر واجب
حتي لو كانت اتاوه
كرهتونا في بلادنا ليه
وفضيتوا جيوبنا من الجنيه
لعبتونا ع الشناكل
من أفعالكم رقصنا باليه
لفيتوا على رقابنا الحبال
البخت الحلو منكم مال
والبسمه اللي ع الوشوش
قتلتها غلو الأسعار
اسعاركم زادت ع الفقير
بهدلتوا وياكم الأصيل
وبقينا بنام صاحيين
كيف ديابه الجبل
بنام عين وانفتح عين
وعيونا شكت منينا
على دموعها اللي بتكوينا
وكل مندور على صدر حنيّن
مش لاقين اللي يحن علينا
الكل على أمره مغلوب
جنب بيته مستني الموت
مش عايز حد يكفنه
ولا عايز منكم تابوت
عايزكم تسيبوه في حاله
من اللي فيه ومن اللي جراله
مش عارف يجهز البنات
ولا عارف يعلم عياله
بقولهالكم من تاني
مش عارف اخبي ولا عارف أداري
بقيت يا حكومه على الحديده
وقوانينكم سودت نهاري
كل شويه غرامات
مجالس محليه ومصالحات
اجيبلكم منين يا بشوات
اشتغل صبي غوازي
ولا رقاصه بصاقات
هنرتاح من قوانينكم امتى
اللي لبشت يا ناس الجته
جيت اكشف عند دكتور
دواه عبا الروشته
قوانينكم تعبتنا يا حكومه
حرام عليكم ارحمونا
الناس بتمشي بقى مجنونه
اللي يكلم يا خوي نفسه
واللي انتحر من البلكونه
قبل ما تبعتوا فرقه
وفروا غرفه ولا شقه
بدل ما نام في الشوارع
كيف القطط تحت دكه
كيف طوارق الليل
كل أسره تستخبه في حته
خلوا عندكم احساس
قوانينكم ضيقت الأنفاس
هنحب بلدنا على اي اساس
حتي البيت اللي حيلتنا
هدمتوه من الأثاث
هدمتوه من الأثاث
شاعر العاميه
نبض الصعيد الجواني
خليفه الابنودي
ليست هناك تعليقات:
إرسال تعليق