...............
صبري حسين
..............
(المسحراتي) كلمات /صبري حسين
( ٦)
مسحراتي
ماشي سواح
اسلم على اللي جاي واللي رايح
هلت علينا احلا روايح
روايح من الجنة
قابلني صديقي
سلم علي
كل سنة وانت طيب يا حبيبي
تعال عايز اشكي
بيتكلم هو بيبكي
تعال يا صاحبي
شوف اللي حصل لي
قولت اعزم اولادي
افرح بلمتهم حولي هم واحفادي
من قبلها بتلت ايام
امهم عمالة تجهز وتحضر
طبخت كل اللي بيحبوه
حضرت الحلويات والفاكهة
قولنا نقضي سهرة رمضانية
نحس بدفي العيلة
نتجمع زي زمان كلنا
ننفس على نفسنا
نتلم مع بعضنا
الحياة واخدانا كلنا
على العصرية
لقيت مراتي الضحكة منورة وشها
بتكلمني وهي مبتسمة
ابسط يا عم اتجمعت كل القبيلة
الفرحة في قلبي كبيرة
حسيت نفسي طاير من السعادة
انت عارف يا صاحبي
انا متعود من زمان
اصلي العصر وانام
لأنه بعد الفطار يحلو الكلام
نحكي انا والاولاد
نلعب مع الاحفاد
فطرنا وصلينا
كلنا متجمعين في الصالة
فرحان بلمتهم حولي
ببص بعيني
شوفت منظر قطع قلبي
كل واحد ماسك تليفونه
اللي بيتكلم واللي بيلعب
صمت رهيب
موش سامع غير تنبيهات الرسايل
كل واحد في وداي لوحده
انادي على ابني
لحظة واحدة يا بابا اخلص اللي في يدي
انادي على حفيدي
نعم يا جدي
عاىز ايه مني
استنى صاحبي بيكلمني
يا أولادي يا احفادي
تعالوا اتجمعوا جنبي
عايزين نتكلم ببعض
نفتح ابواب الحوار
نسأل بعض عن الاحوال
بتكلم مافي حد سامعني
لا ابني ولا بنتي
ضربت كف على كف
سبحان الله اسمنا متجمعين
لكن كلنا عن بعض بعاد
قاعدين في نفس المكان
لكن الكل مشغول عن التاني
لا كلام ولا لعب
راح فين هزار الكبار
راح فين لعب الصغار
الكل مشغول بتليفونه
مركز في اللي في ايديه
مافي حد حاسس بااخواه
ولا مهتم يقعد مع ابوه
ناديت على امهم
تعالي شوفي اللي حصل لاولادنا
بقوا اغراب عنا
اغراب حتى على نفسهم
النت شغل كل وقتهم
ضاعت فرحة اللمة
بقت لمة ماليها لازمة
كفاية علينا التليفون
اقول ايه
يلعن ابو التكنولوجيا
اللي بعدتنا عن بعضنا
خلت صلة الرحم مجرد مكالمة
بالذمة ينفع ده الكلام
بذمتك دم موش حرام
حتى عزومة رمضان
اللي بننتظرها من العام للعام
بقت ممنوع فيها الكلام
اقول واعيد ايه
خلاص تعبت من الكلام
الله يرحم ايام زمان
مسحراتي
بترحم على زمان وليالي زمان
يا كل الاهل والاصحاب
كل سنة وانتم طيبين
رمضان كريم
صبري حسين
ليست هناك تعليقات:
إرسال تعليق