................
عبد الكريم خلان
.............
حروفي
من عرش اليمون جنيت حروف
نعصرهم دوى هدية ما تباع ما تشرى
ومن عرش التفاح جنيت كلام
حليتو بلساني بحلاوة تخلي الفاهم يرتاح
أنا غير فلاح حارت في جنان النية
نجني تمار الصباح ويشيط الخير للعشية
جنيت حروف من عرش الكركاع
نعصرهم نفع يتشاف و تسمع
ما ني بالغلا شاريه ما انا ليه بياع
من عرش التوث جنيت كلام
خالي من البهوت به نهدي التحية و السلام
نشمت عيب و حرام وفي بالي غادي يدور الدوور ونكون مشموت
جنيت حروف من أعماقي و قلب سموح
نهديها لكل روح قبل تزهق الروح
جنيت كلام من همومي و انا مجروح
عصرتو صبر بيه نواسي المجروح بحالي
جنيت حروف من افراحي عصرتهم امل و هدية غلفتها بالنية
حيلتي في لي نويتو يرجع ليا
حروفي حروف شوف و سمع
من ورا الرزق ما تبقا تجري ملهوف
بالقسمية تعيش وبحياتك تتمتع
الكلام ماشي كلامي واضح و معروف
شي سمعتو وشي عشتو و الباقي جابتو الظروف
عبد الكريم خلان
ليست هناك تعليقات:
إرسال تعليق