..................
Khadija Reda
..............
النفاق....
سمعو يا حضار
جبتلي كوم قصيدة خطر
سمعوها ليل ونهار
نهضر على نوع من البشر
منافق كداب وغدار.
المنافق لسانو يسر
وقلبو يلسع و يضر
وديما ناوي على الغدر
والقلب الصافي منو ينفر
فالوجه يمدحك ويكبر
وفالغيب مواس ماضية يصدر
يطعنك ويضربك للظهر.
يجيب هضرة ويزوقا
ولمن ما بغا يلفقا
يمشي فرحان فالزنقا
ما متهوم بغش ولا سرقا
جريمتو كفس ملي سبقا
نسا الصفا الحلاوة والنقا
لوث السما الصافية الزرقا.
انا منافق إذن انا موجود
عندو الكذوب بلا حدود
باب الصدق عندو مسدود
يكذب الحاضر والشهود
واخا تطلع للقمة
عرف راك فبحر الظلم ممدود
وبعقاب الله موعود.
الكداب كلشي عليه مجموع
حلاوة اللسان كلامو مسموع
كلامو سخون يذوب الشموع
يهضر ويدعم بالدموع
الصادق مسكين فيه مخدوع
يكدبو او يعارضو ممنوع.
تشوفو تحسبو صاحبك
وشنو ما درتي راه تابعك
على الخوا الخاوي يحاسبك
وفظهرك مع الناس طاعنك
ويقول لهم بالصفا فايتك
انت عارفو وهو ما عرفك.
حيد النفاق حيد القناع
حيد الغيبة حيد الصداع
عاون لي تعرا ولي جاع
ولا تبع طريق الغدار لي باع
باع ضميرو وعقلو ضاع
غيبيع فجهنم النعناع.
النفاق ولا عندنا فن
لي ما تعلم ليه يتمحن
يشربك السم وفيك يعجن
يحسب الكلام و يوزن
تقول هذا انسان متمكن
والوسخ فدماغو مركن.
حلاوة اللسان تقول هنا نبات
الرزانة يا سيدي والثبات
قاري وحافظ تحريميات
يهضر فالرجال والبنات
ما كيفكر فالاخرة والممات
ويقول هاكدا الوقت بغات.
سعدات لي عندو وجه واحد
ما يتكبر عليك ما يعاند
وغير تطلب منو تلقاه واجد
يعاون المسكين ويساعد
ومع الاخيار ديما متاحد
وديما لله الخالق عابد.
باراكا علينا من الكذوب
خلينا ما نفكرو فهروب
من بلادنا الغالي المحبوب
ما ندخلو مع أهل فحروب
خلينا نبدلو نحسنوا الاسلوب
خلينا بالصدق نوروا الدروب.
خ. ب.
ليست هناك تعليقات:
إرسال تعليق