..................
................
حكاية يام الغرام و سياد لقدام.
و صلوا على النبي،
اللهم صلي عليك يا رسول الله،
هَذِي حْكَايَاتْ كْنَّ نْقَصْرُوا بِهَا لْكْلَامْ،
بِينْ جْمَاعَة وَ رِيحْتْ الشَايْ تْعَطْرْ الْمْقَامْ
هَذَا زْمَانْ لاَ خْبَارْ لْحْبِيبْ إِلَى مَجَبْتٌو لْحْمَامْ،
الْجَارْ اسَوَلْ فِجَارْ كُلْ وَاحْدْ فْسَرُّو مْهْمُومْ،
الْݣَلْسَة فْالشْتْوَة عْيُونْ تْغَنِي بَالْبَرْدْ وَ الْغْرَامْ
النَّارْ شَعْلَة وَ مَنْ بْسِيطْ نْصَنْعُوا الْحْلاَمْ،
حكايات كْنَّ نِحْكِوْهَا حْكَوْهَا شْيُوخْنَا الْقْدَمْ،
كانت دنيا خويا كاين غير رعي اسْرَحْ لْغْنَامْ
عشيرة بعيدة، لا صالح فيها من غير النَّمَامْ،
هذي حكايات الزمان، يَامْ عيشة قنديشة،
و روح كلام الموزون من شيخة خربوشة،
كان فقير مَعَنْدُوشْ، مْقْطُوعْ مَنْ الشَجْرَة
واقف و جالس يَامْ دَزْتْ كِي بِئرْ بْلَا جْرَّة
كي سماء بلا شمس اتْسَنَى الْحْمَامْ الْمْهَجْرَة،
عَاشِقْتُو كَانْتْ حْزِينَة، مَنْ كْثْرَتْ الْهَمْ مْغَبْشَة،
حْكَا لِي يَامْ زْمَنْهَا، فِي مَرَّاكْشْ كَانْتْ نْقَّاشَة
تطلب يد النصارى بضمير حياة مْغْشُوشَة،
في ليل وحدانية، مغبونة مْجَبْدَة عْلَى خَنْشَة،
بالدموع تصلي وتدعي، ياربي رْخِ الْمَعِيشَة،
لاَ خْبَارْ حْبِيبِي وْصْلَتْنِي، رَانِْي غْرِيبَة وْ مْشَوْشَة،
لَا ْخبَارّ بْلاَدِي، رَانِي حَاصْلَة، زَهْرِي كِي مْقَنْشَة
فِي الزَنْقَة، اي رْبِّي يَا الِْعَالِي، رَنِي مْجْرُوحَة،
غْرَامْ حْبِيبٍي وْ حْبَابِي، يَا الْغُرْبَة، رَدْنِي الْفَرْحَة
رْجَعْنِي لْحْبَابِي، رَانِي هْنَا بِينْ عْيُونَكْ مَلْيُوحَة
كِي ْبݣْرَة مْجَوْعَة، لا ݣْزَارْ شَرِيهَا وَ لَا هِيَ مْذْبُوحَة،
لا من عشبك تْبَاتْ شْبْعَنَة ولا فجبالك مْسْرُوحَة،
دَازْتْ يَامْ وَسْنِينْ، لَا خْبَارْهَا جَاتْ مَنْ الْعَطَّارْ،
رَبِّي وَحْدُه لِعَارْفْ، الْمَغْرُومْ حَالْفْ مَيْسْكَنْ الدَّارْ،
جْمَعْ مْتَعُو وَ بْرْجْلِهْ قَاطْعْ الْوَدْيَانْ وَ خْوَ الدَّوَارْ،
مَنْ مْدِينَة لْمْدِينَة وَ جْبَلْ لْجْبَلْ لاَ حَسْ وَ لَا خْبَارْ،
لْمَغْرُومْ مَا هُوَ حَيْ مَاهُوَ مَيِّتْ، شْكٌونْ إجِيبْ لْخْبَارْ.
و صلوا على النبي،
اللهم صلي عليك يا رسول الله.
...
ليست هناك تعليقات:
إرسال تعليق