..................
................
يااسكندرية
أجمل مافيكي
ع البحر ليكي
قلعة وفنار
البحر شطِّك
ف القلب حطِّك
بدراعه حاوطِك
وعليكي غار
من نسمة طايرة
من نظرة حايرة
أو كلمة دايرة
ف بُق جار
يابحر ياللي
بالشوق مخلّي
حُبك تملّي
ف القلب نار
والبحر موجة
بتزُق موجة
مش قاصدة حاجة
غير الهِزار
حلمَك عليا
ف الموج يابحر
باعشق ماريّا
وهواها سِحر
والشمس تسقط
وراك يابحر
وانا قلبي يهبط
من شوق وهجر
واسهر بألالي
من قلب خالي
وعيون تِلالي
لولي ف محار
وابعت رسايل
للموج واحايل
يرجعلي شايل
ألف أعتذار
ع المينا واقف
يابحر شايف
أهل ومعارف
في كل دار
واسكندرية
تفضل ماريّا
ف القلب غيّة
دايماً عَمَار .
شعر ..
ليست هناك تعليقات:
إرسال تعليق