.......................
ايمن عزالدين سكورى
....................
•••••••••••••• ( يافن يافن !! ) ••••••••••••
لما يغنى شاكوش وبيكا
ويمثل الواد نمبر وزيكا
والبت باتعة تبقى نجمة
رغم إن أفلامها طينة
وأعمالها كلها لكلوكه
ده يشجعنى إنى أدخل
كار الفن وأشوف تسليكه
أنا ف دماغى طرقت فكرة
أنا حالبس من بكره بروكه
واجعر وانعر ف الميكروفون
يمكن ياخدونى مطرب ياويكا
واشترى أغانى من زعبوله
مش مشكلة لو تبقى ركيكه
بس المهم رقاصة جنبى
متودكه آخر توديكه
لو لاقتنى بانشز تدخل
برقصة تنسيك أسم أبيكا
طب فيها إيه لما أغنى
ماهوه كتير هُبل وعكيكه
بيقولوا أي كلام وطحينة
وكله من شرب المدعوكه
مافهاش حاجة لما أهرتل
وأدخّل مقام بياتى ف سيكا
وان ضربونى جوز اقلام
ساعتها أجرى واقول يافكيكا
ولا أقولك السينما أحسن
بلا خوته وشغل البولوتيكا
فيها حلاقى المال والشهرة
من أفلام هايفه وانتيكا
أطلع فيها بدور حبّوب
وطول الفيلم أندغ مستيكا
وامشى أعاكس توتو وميمى
وانسى ميعاد البت ماريكا
ولو قافشتنى وانا ف السكة
وجت شدانى من السكسوكه
حاعمل فيها ياناس تعبان
وصابنى جنان واخدها ف دوكه
واجرى وراها جرية عبيطه
واقوم واقع على الكمبوكا
إيه رأيكوا ماهو فيلم كوميديا
حانسميه إسفوخس عليكا
ولا أقوم بدور بلطجى
وألم جنبى عيال عرّيكه
شكلها بؤس يودى لُيمان
الله ياابنى مايوريكا
اللى واخد بشله ف خده
واللى ياهو شلاضيمه سميكه
واللى ف وشه سواد وكأنه
دهنينه ف ورشة ميكانيكا
واللى كرشه جبل قدامه
ورابط شعره ياخلق بتوكه
واللى عاوج بقه لودنه
عشان صياعته تكون مسبوكه
والأشكال دى حاصور بيها
فيلم عظيم للمخرج سوكه
حيكون فيه ضرب وتكسير
وعراك على طباقين شكشوكه
ولا بلاش أدخل ف الفن
أصل اليوم بقى هيكا و هيكا
~~~~~~~~~~~~~~~~~~
الأديب والشاعر
والمحرر الصحفى
ايمن عزالدين سكورى
من مدونتى
صداح فى بلاد غريبة
ليست هناك تعليقات:
إرسال تعليق