....................
نجوى رسلان
..............
سألت نفسي لو كان عندي بنت
وجلها عريس
ممكن أنصحها بإيه
(بقلمي:د/نجوى رسلان )
ممكن يكون معاه فلوس بالكوم
لكن بيها يبخل عليك
ممكن يكون بنك متنقل لكل اللي حواليه
لكن معاك بير مخروم
دايماً الجزء الفاضي هو اللي ليك
لكن مع الباقي يحدف بالكوم
ساعتها مش هينفع لاندم ولا لوم
*اختاري الحنين عليك
ما تحكميش بحنيته على أهله مش شرط خالص صدقيني
ممكن يكون معاه قلب كبير بيساعد ده ،
ويحل مشاكل ده، ويقف جنب ده
لكن لما تحتاجيه في أبسط الامور
يصرخ في وشك
يقول هو انا ما فيش ورايا غير بلاويك
جربيه في مشكلة
*ممكن يكون معاه حكمة ونصايح من دهب
تِقوِّم المايل وتعمل من التراب دهب
لكن لما تطلبي منه النصيحة
يقابلك بوش خشب
اختاري اللي يحترمك
مش اللي دايماً يغلطك قدام الناس
بدل ما يحتويك
وبجناحه يرفرف عليك
ما تختاريش اللي ما يصدق يسمع حد بيعيّب فيك يكمل معاه
اختاري اللي يحافظ عليك
وما يسمحش لمخلوق يجي عليك
اختاري اللي يحترمك قُدام الناس
بينك وبينه عادي يفهمك يعاتبك يوّعيك
اختاري اللي يعرف إن كرامتك من كرامته
مش اللي شايف الرجولة
إنه يسحبك بحبل ويقولك شِي وراه
اختاري اللي يعلّي مقامك وقيمتك وسط أهله ويتباهى بكل حاجة حلوة فيك
مش اللي يِقل منك ويقدمك على طبق من فضة لأي عابر سبيل يجرحك ويؤذيك
اختاري الراجل مش الذكر
اختاري اللي يعرف حقوقك ويحفظها وحقوق أهله ما يدوسها
ومايِملش لجنب على حساب التاني
اختاري اللي أبوه حنين على امه وبيحترمها لأنه مراية أبيه مهما قالك كاني وماني
اختاري اللي يسمعك مهما كان كلامك عبيط
كفاية إنه بقلبه يحويك من البكا والعييط
اختاري اللي بعلمه تتباهي
اللي دايماً يفكرك بربنا لما يحس
في لحظة إنك ممكن تغفلي أو تنسيه
اختاري اللي يصلي بيك وبولادك إمام
اللي دايماً يشجعك على الخير
ويرويك بالاهتمام
اختاري اللي دايماً يسألك صليت الفجر حاضر؟
زي ما بيفرح منك لما تقوليله كلمة حاضر
اختاري اللّي لما حد يعزم عليه بعزومة وإنت وولادك مش معاه ما يحسش بطعمها ويقول اللقمة معاكم أجمل ألف مرة
مش في أي مكان يحُط
ويسبكوا تتحنطوا في انتظاره
اختاري اللي في همومه بيبقى متأكد إنك أقرب شريك
مش اللي دايماً شايفك مش حاسة بيه
ويخبي عليك كل حاجة كأنك زوجة أبيه
اختاري اللي من حين لآخر يقولك بحبك
لو حتى مش بالكلام بنظرة حلوة بابتسامة ..طبطبة ...كوبايتين شاي وضحكة حلوة تحسسك بالأمان
بلاش الفَظ اللي عيشته كلها تكشير وشخط وزعيق على أتفه الكلام
اختاري اللي تنادي عليه برقة يقولك عيوني
مش يزعق ويقولك عوزة مني إيه
يا مدام
*اختاري اللي تعطيه حياتك ودلالك في بيت أبيك
يعطيك احتواء فتكوني له الزوجة والصديقة والابنة والأم كمان
*اختاري الشريك في المُرة والحلوة
وسيبك من الناس المرسومة
وهي جواها بالونة مليانة غازات سامة
*اختاري اللي وجودك جنبه يحسسك بكل الدفى وكأنك مع الحبايب كلهم لَمّة
*اختاري اللّي لما تتعبي يحس بوجعك
مش يجري على مامته ويقول بلاش وجع دماغ
بلاش اللي عنده فرط حنية على اللي شاري واللي باع
ومعاك يحسسك بشعور الارتجاع
اختاري اللي ولاده يتباهوا لما يقولوا أسميهم وهو بيزين الاسم بعُلاه وسمو أخلاقه وتعاملاته الحلوة مع الناس البسيطة الطيبة
مش اللي بيخافوا لا حد يسألهم عن الإسم خجلاً يا ولداه
*آخر حاجة ممكن تختاريها هي جِيبه
مهما كان مليان ممكن يصب عليك الغُلب
والخير يروح لصاحب نصيبه
اختاري اللي دايماً شايفك جميلة فتهتم بنفسك أكتر واكتر عشان تسعديه
مش اللي مش شايفك أصلاً
فتحسي بالعجز في عنيه
ما تختريش اللي يحسدوك عليه
اختاري اللي قدام ربنا ترفعي إيديك ليل نهار وتحمديه على نعمة وجوده في نن عنيك وجوه قلبك تلاقيه
*إوعي لما سنك يكبر
تقولي هملا خانة الزوج وآخد لقب المدام والسلام
يا إما سَكن وسكينة وأمان
ياإما شكراً ألفين سلام
اختاروا صح تعيشوها صح
بلاش تخيبوا في الاختيار
عشان ساعتها مش هتتحملوا
شعور المرار
وارجعوا لربنا
واستخيروااااااااااااااااااا
نصيحة لابنتي التي لم ألدها
بقلمي : د/نجوى رسلان
ليست هناك تعليقات:
إرسال تعليق