....................
بلال هشهش بيلا مصر
..................
() (( يادار البديع خلعنا ضروس )) ()
متطلبوش التمن على خبزة بلحمة
أكلها ناشر فقير ميمتلكش فلوس
بيدعي زور اللحم كان مرشوش
متحمر في زيت مغشوش
هتاخدوا إيه من واحد مهووس
إنضرب في الخلاط..خرج مهروس
لو شاف مية الفول يقول
عازمكم علي حفلة صوص
كل صرخة فيها يقول الأه يشوفها
طالعة بوجع. يدوس عليه محروس
نفسه شوية شُربة و لمونة
أستخصرها فيه خلبوص
فقير وتايه في العدم
عايش بس الدماغ ملحوس
ماشي مفلس وعارف إن المال
كله في الخزاين مرصوص
ضارب بعينه شايف
دبايح واقفه في دورها صفوف
كله بيتكلم يجعجع بصوت عالي
ييجي اللسان عند الجزار مخروص
أه يالحمة العيد ياما حلمت بيكِ
حته من الصدر او حتى من الدبوس
لو التجار شايفنا خرفان علي طول
يعطونا فرصة نكون فيها تيوس
جينا الحياة نحلم بالغطىٰ
شكلنا طالعين منها بلبوص
بقلم الضاحك الباكي بلال هشهش بيلا مصر
ليست هناك تعليقات:
إرسال تعليق