............
عبدالله رجب ابوعدنان
...........
مولود جديد.
عبدالله رجب ابوعدنان
مولود جه الدنيا
بيضحك م الغلا
ف عز برد الشتا
حس بوجع و ألم
جريت وقلبي عليه واكلني
اتولد بين اديا وف حضني
ف لحظة طيش سرقوة مني
مولود جديد اسمه الحلم
جاله دور برد
م اللي خلفو الوعد
واللي اتعود يهد
ورافض حتى يتعلم
وف سرداب الليل
كان عندي صندوق قديم
لميت كل الهلاهيل
متسلق وسارق ولءيم
إبني بيصرخ و عليل
بعد ما كان زي النسيم
لا بينطق ولا بيتكلم
خالتي واسطة على عم بقشيش
وشوية تطبيل و ناس ما بتختشيش
وانا زي ما انا من خمسين سنة
تقلب ف جيوبي تلاقي مفيش
يدوب شويه قصايص ورق
وشاعر بيحلم
إبني كبر ومخاوي
بالحب ياناس راوي
حتى الطبيب المداوي
شاف الحلم مضلم
و أمي شايلالي وصية
ف خلجاتها
البلد دي عارفه سكتها
ناس بتشتري ضحكتها
وناس راضعة آسية
وابنك قصدي حلمك
بيموت ف كل ثانيه
ولا نافع معاة أدوية
وارضى بنصيبك وسلم
دافعت عن إبني بكل جسارة
وبشوف الدمعه ف عيون الغلابة
طول عمرنا بنسمع تنمية مستدامة
وناس بتشبع قوي
وناس م الجوع بتتكوي
وع الحياة بتندم
وخدت كورسات ف الأمل
لكن رغم الشيبة جرحي ما اندمل
لسة موجود ف حياتنا هبل
لسة طعم الجاهلية مكمل
والفهلوة ركبت العلم
لسة فيه شاويش و امين
لسة من كل حاجه خايفين
مولود الغلابة وجع و أنين
وناس بتسرق توت عنخ امون
وبتجمع كل أحلامنا
وب إسم حب الوطن بتكوم
ليست هناك تعليقات:
إرسال تعليق