................
مصطفى فريد
.............
صورتك
من ديوان/ بيحسدوك على إيه
للشاعر / مصطفى فريد
فى جوف الليل
باشوف صورتك
بتتسحب
وتدخلنى بصوت مدبوح
عشان تشكى مرار بعدك
وتحكى لى ٠٠
عذاب الهجر والوحدة
دموع ذرافه فوق الخد
تمنى نفسها برجوع
لحلم سراب
فى ليل بتفوح
روايح غربته فينا
زرعنا جراحنا بإيدينا
وفى الضلمة دموعنا شموع
بتتسرب
وتحفر ع الخدود سكة
وترسم بالألم نهرين
ولكن ملحهم سايل
بيمرر حلا الأيام
وليلنا لسه بيعاند
رافض للنهار يطلع
ويقلع عتمة التوهة
إللى بتعافر وبتسافر
فى أحزانا إللى غرقت
فى بحور العند والأوهام
ولساها دموع حزنك
بتقلقنى فى جوف الليل
وأنا سهران مع صورتك
وسيرتك سبقت النسيان
وسكنت جوه شريانى
تفكرنى بليالى زمان
وكل ما أقول أنا نسيتك
ألاقى فى حضنك العنوان
أعود تانى ٠٠
أغمض عينى على صورتك
وأحضن فيها أيامك
وأحلامك
وذكرى باعيشها علشانك
ليست هناك تعليقات:
إرسال تعليق