..................
أحمد الكندودي
......................
زجلية تحت عنوان:
قالوا ***
كل كيال عندو زرعو
ؤ كل زرع عندو كيالو
و لهبيل فاق ؤ لعقل ردعو
تبدل بنادم ف طينتو وطبعو
وقفت الرحى عاد شاحب حالو
مصلوب على خشبة شكاه ودمعو
تاه في الزحمة ؤتلف خيالو
بل مرعوب غارق ف فزعو
سبع وجوه ؤ ولات مضروبة قوالو
غرقو لحظ ف لفرع ؤ نسى جدعو
صمتو انات مشغول بالو
يدوي وحدو زاعف ناشف ضرعو
هم الدنيا وزراوطها غاب هلالو
م عايش محبة ولكباد منو ما شبعو
ما سقاهم صحبة ولا دواهم ب فعالو
بل تغربو مساكن وكلها دار شرعو
لا سند لا محبة والجمع ضاع وصالو
الشر ولقبح من بزولة لوقت رضعو
فقد صباغتو كحال سعدو ؤ راحة بالو
جرفو لمظهر ؤ لمسارب ف البال داعو
مد يدو ؤ دنس لخير كسبو وحلالو
بغى الفخفخة سي السيد بوعو
زعما بمالو سعيد ؤهو والو
ريحة داعت ؤ زادوا تبلاو تباعو
داتو الحملة ؤ ضيق خيالو
لعلة سكنت الجوف واهل الفش داعو
لمعقول غلبو لبهوت ؤ داستو نعالو
عاد صعيب ولزرع الخير يرجعو
ترجع الثقة ولوفا لمحبة وصفا معوالو
فكل كيال عندو زرعو
وكل زرع عندو كيالو
ؤ لهبيل فاق ؤ عقلو ردعو
ومول لعقل هبل ؤركب هبالو
*** الزجال والشاعر: أحمد الكندودي *** المغرب ***
ليست هناك تعليقات:
إرسال تعليق