.....................
محمد السوارتي الادريسي
.................
زجل:
علاش ...؟
البغض والحقد
والدنيا بللي فيها
ما دايما لحد
علاش...؟
دم القربا برد وجمد
بين البنت والولد
والوالدين والجد
علاش...؟
الظلم طغى واتجهد
والعدل بينا اتفقد
والفقير عايش ف النكد
علاش....؟
العشرة ولات قهرا
بين الأهل والأسرا
بخبث لخصام والهضار
علاش...؟
الزمان بالفاعيل تغير
اتعدم الإحترام أولوقر
الصغير ع لكبير يفجر
علاش....؟
شي ما يسمح لشي
كلا شاد فحبل مرشي
محبة الطنز والفرشي
باش عامر كل شي.
فساعت الضيق
إبان لحبيب والرفيق
والشدة عيار عتيق
تميز العدو من الصديق.
لمحبة الصادقة
اتبان فالخصومة
واللسان الجارح
جرحتو مسمومة
تخلي النفس مغمومة
وف القلب كية مرسومة.
الزمان للدنيا ميزان
للخير والشر باسط كفوف
لحساب فالأخر إبان
ليام الجارية صروفو
غدا تتحقق يا إنسان
عند وقوتو وضروفو.
زرع الخير واترجا الوافي
مادام الماء ف المطافي
والعمر بالريق صافي
قبل ما اتكدا لعوافي.
نترجاو الله الرحيم الواقي
احفظنا من كل عاق شاقي
وانصليو على النبي الراقي
صاحب الغمامة والبراقي
بقلم.
محمد السوارتي الادريسي
ليست هناك تعليقات:
إرسال تعليق