............
عبدالرحمن التهامي
...........
* الفخر بالنفس والاصحاب
اصحابى الاعزاء المجندين
دفعه سبعه تسعه وتسعين
الى خدمت فى سلاح
المهندسين العسكريين
بفوج تطهير الصحراء الغربية
ديما بأمر الله موفقين
وخليكم فكرين
إننا قضينا احلى عامين
فى حقول ألغام العالمين
ونجانا من الموت
فضل دعاء الوالدين
يا محمد رمضان
فاكر لما كنا مرشحين
للسفر لتطهير الغام لبنان
ويومها كنت زعلان
قلت لو مت هنا هموت فى وطنى
حتى لو لغم بعتر جسدى
هكون مطمأن لانى
هأبعث تانى منه
ولو بعترنى لغم لبنان
أبويه هيعيش زعلان
وامى هتروح فيها كمان
هتقول آه
لو مات في مصر
كان قلبى قبل الموت حس
كنت ادعيله دعوه
الموت هيسمعها
ويهون عليه
فاكر يا على جمال
لما ردك كان فى منتهى الكمال
وضربت لينا أعظم ميثال
يوم لما خسر النادى إلى بتحبه
وضحكت وهللت الصحبه
قلت عيب عليكم
دا فريق مصرى
اتغلب من فريق افريقى
بتشمتو لما الغريب يهزمنى
لو لغم فجركم
مين هيروحكم
انا ولا كانو النجيرى
فاكر يا شادى انت وحسام
لما القاده العظام
يجمعونا بعد الطعام
ويحكو معانا احلى كلام
ويسئلونا عن حياتنا
وازى بنقضى اجازتنا
فاكرين لما ايجى سؤالى
قلت بقضى اجازتى
بزياره لكل قرايبى
واسئل عن كل حبايبى
واعرف مين مات فى القريه
وانا موجود بالوحده
واروح واعزى أهله
حتى لو فات مده
واساعد أبويه وعمى
فى كل شغل أرضى
والف القريه كأنى
هروح ما هرجعشى
فى شورعها امشى
فاكر يا أكرم انت وأشرف
يا احلى اخوات تؤم
لما ايجى دورك يا اشرف
حكيت وبعدك كان اكرم
قام يحكى
وكلامه كان احكم
القائد بالشبه عرفكم
قال ازى مش اعرف
لازم يستبعد واحد منكم
عن عمل الألغام فورا
رد اشرف لا يا فندم
الموت لينا اشرف
وبكت عنيه وقال
احنا مش عيال
تستبعدونى عن عمل الرجال
بكى القائد وقال
كفايه واحد يا ابنى
رد اكرم قال
خلقنا ربنا اتنين
وقدمكم جسدين
خلونا مع أصحابنا
وسط الألغام
نتطهر الارض لينا
ولحبيبنا اهلينا
ولو اختارت واحد فينا
استبعدو إلى هيبقى فينا
فاكر يا محمد يا صلاح
لما سئلوك
باين عليك بتحب
وانت واد حلوه تتحب
لو قلت اسم حبيبتك
هتنزل اجازه اضافيه
تشوفها وتملى عنيك
قلت حبيبتى اسمها مصر
كل لحظه شايفها
ومالى عنيه منها
كلنا وقفنا من وضع جالس
نصفق لاحسن كلام اتقال
فى المجالس
ورفضت الاجازه الاضافيه
وقلت هأنزل اجازتى العاديه
اروح واجى
مع اصحابى حبايبى
** كلمات عبدالرحمن التهامي
ديوان وطنى
ليست هناك تعليقات:
إرسال تعليق