................
سعيد حسان
................
( ما بتحمدش الله )
للشاعر // سعيد حسان
يا اللي ف نعمة وخير خد بالك مابتحمدش الله
لو كان حاسبك ٱول بٱول مش هتوفي الدين
ممكن ( يمهل ) وانت عنادك هيوديك على فين ؟!
إوعي تفكر إنه ( بيهمل ). حيوريك بالعين
بس ساعتها مش هيفيدك والٱحكام لله
يا اللي ف نعمة وخير خد بالك ما بتحمدش الله
لو بصيت حواليك هتلاقي دنيا وخلق كثير
والٱحوال مش ممكن ٱبدا تبقى بدون تغيير
والعيان راح يصحى وبكره تلقي السبع ضرير
واللي بيشحت يصبح باشا وإنت تقول لله
يا اللي ف نعمة وخير خد بالك ما بتحمدش الله
دا انت ف عافية وصحة كبيرة والمنان يديك
قادر وحده يهد ف حيلك إوعى الله يخليك
دا ٱنا بنصلي وبندعيلك لو ربنا يهديك
تعرف فضله ويزيد خيرك قوم واسجد لله
يا اللي ف نعمة وخير خد بالك ما بتحمدش الله
دا انت ف نفسك سيد العالم حتى إن كنت ضعيف
ومفيش حد يذل كيانك طول م القلب نضيف
ولا بتمدش إيدك مرة عشت العمر شريف
وما بتبصش ٱبدا برة عارف حق الله
يا اللي ف نعمة وخير خد بالك ما بتحمدش الله
عاوز. إايه ما المولى إدالك بيت والوش جميل
ساكن فيه ويلم عيالك عمره ف يوم ما يميل
وٱم عيالك قاعدة قبالك بتغني ف مواويل
وإنت لفضل الله مش ناسي والٱرزاق بالله
يا اللي ف نعمة وخير خد بالك كله بٱمر الله
( مابتحمدش الله )
الشاعر // سعيد حسان
ليست هناك تعليقات:
إرسال تعليق