....................
الزروقي جواد
.........................
گالو ناس زمن
گالو ناس زمن
ناس كانت بكري
على رزقها تجري
وتجني خبز الحلال
كان رسمالهم
القناعةو الكرامة
والنفس شريفة
صافية وعفيفة
گالو ناس زمن
بكري كان السارح سراح
يسرح فالخلا
ويعس على الكسيبة
وكان الكلب نباح
وحاضي داك الزريبة
كانت المرا تشطب فالمرح
صابرة على الزمن
ومعمرها تشكت
ولا گالت من تمارة أح
گالو ناس زمن
بكري كان الجار
هو مول الدار
واليوم ولا صبح الخير يا جاري
أنت فدارك ونا فداري
گالو ناس زمن
على ناس اليوم
راه السارح ولا سواق
والكلب ولا عواق
والعروسة من الأول
تتشرط فثمن الصداق
من بعد تطلب الفراق
وتطلب حتى الطلاق
گالو ناس زمن
فهاد الزمن كثر العجب
مات الصدق
وعاش الكذوب
وكحالت القلوب
گالو ناس زمن
صبر يا بنادم
سيدي ربي راه عالم
وعارف المظلوم من الظالم
صبر وزيد صبر
فالأخر كلشي غادي
يمشي للتراب
ويتدفن فذاك القبر
الزروقي جواد
المغرب
ليست هناك تعليقات:
إرسال تعليق