..................
محمد عبد النعيم
.................
الصدق ..
*****
الصدق
ليه يا إخوانَّا
في زمانَّا
بجناح مكسور
والكدب عايش
ما بينَّا
فارد جناحه
يغني لِينَا وفِينَا
سعيد مسرور
والنور لو هل
عَلِينَا..
يلاقي في طريقه
ألف سور وسور
ولو عَدَّى لِينَا
وخطى السور
عَلاَّه فوشه البانِي
بأمر الباطل الكَدَّاب
وسَد فوشه الباب
وخلى العتمة غطيس
وهباب
لا تشوف شمس
في نهارها
ولا قمر في ليلها
ومهما تنور شمعة
تلاقي ألف نَفَس
بارد يطفيها
ولو شبت نار
تدفينا في زمهريرها
ألف إيد تمتد ليها
وتكتمها
ولو حاولت
تخطي السور
عشان تهرب للنور
منها
تلاقي ألف كلب
مسعور
ينهش في لحمك
وأيادي كتير
تزقك ..
وإيدك بتتمدلها
وإنتَ بتخطى
السور ..
ولو ضحكت من قلبك
سعيد مسرور
ضحكة عالية رنتها
تلاقي ألف إيد
تحوشها
وتكتمها ..
وتسد منبعها
وترش في طريقها
شوك
وتهلل لأحزانك
و تغنيلها
وهيا دي دنيتنا
وهو ده حالها
بس الصدق
مهما غاب عنها
هو طوق نجاتنا
وضلتنا
ومهما طال الظلم
ع المظلوم
الصدق غالب
في يوم
والكدب سراب
معدوم
من نفخة صدق
ينطفي ويزول
وتنزاح العتمة
ويهل علينا
النور..
ويتكسر جناح
الكدب
ويحلق ما بينا
الصدق
بجناح من نور
ويغني فينا
سعيد
مسرور ..
محمد عبد النعيم
٢٠٢٠/١١/٣٠م
ليست هناك تعليقات:
إرسال تعليق