...............
سعيد حسان
..................
الشاعر سعيد حسان
( إيه تتمنى ؟؟!! )
صاحبي سألني إيه تتمنى ..؟؟!!
قلت اتمنى أعيش ف الجنة ...
قاللي استنى ...
هي الجنة طريقها منين ؟؟!!
كل الدنيا من شرقيها ومن غربيها...
بتحلم برضه...
تعيش ف الجنة ....
حتى الفاجر ...
نفسه لوحده يخش الجنة ...
أي والله..بيحلم بيها ...
وبيتمنى ف يوم يتهنى...
قلت يا ساتر....
حتى الفاجر كله حنين
طيب فين القلب الطاهر ؟؟!!
اللي بيسهر طول الليل وبيعبد ربه...
واللي بيدعي... ويرفع إيده لفوق.. من قلبه...
بيفضفضله.... من غير حتي.......
ما يسمعنا
صاحبي سألني..إيه تتمنى ؟؟!!
قلت المؤمن نفسه يشوف العالم كله بخير وسلام....
نفسه يكون الحب حقيقي....
مش أوهام
وبيتمنى ؤزول الكره ...
ويصبح كل الناس أحباب
كده علي طول من غير أسباب
وانا باتمنى..لكل العالم
تتحقق كل الأحلام
وارسم فوق القمرة اتنين....
يربط بينهم....سهم بيرشق ف القلبين......
ومفيش حد يفرق بينا......
صاحبي سألني ...إيه تتمنى ؟؟!!
قلت اتمنى الخير لولادي...
قال...شيء عادي...
فيه ف الدنيا ناس تانيين ...
أطفال سوريا وفلسطين...
كل ضحايا الحرب بتصرخ.....
إحنا ياناس هنروح على فين ؟؟!!
مين هيلم الشمل عليهم ؟؟!!
لاجل يعودوا ف حضن بلدهم .....
ضي عنيهم ..
علشان يبنوا بيوتهم تاني....
أو يتقابلوا مع حبايبهم أو أهاليهم
يفرح كل خواتهم بيهم ...
عمو محمد ..أو براهيم ..
أو بولا وحنا ...
صاحبي سألني ...إيه تتمنى ؟؟!!
قلت تزول الامراض عنا...
والحزن يغور ويودعنا
والافراح ترجع والمغنى
واقدر اسافر من غير فيزا أو بوسبور
نفسي ألف العالم كله..
زى حمامة أو عصفور
مش بيقولوا إن العالم أصبح قرية ؟؟!!
ومفيش شيء أصبح مستور ..
طيب مين اللي بيبعدنا ....
عن بعضينا ؟؟!!
واللي بيبني بينا وبينكم مليون سور
اللي بيحكم وبيتحكم فيكوا وفينا
شايفين آخرة جهله وعنده ؟؟!!
زي الطير ما بيبني ف عشه
بس بيرجع تاني يهده ...
يبقي دا بنى ؟؟!!
بيشردنا ويبهدلنا...
صاحبي سألني إيه تتمنى ؟؟!!
قلت اتمنى كتير....وكتير.....
أنا باتمنى ماشوفش في كل الدنيا فقير....
هو الظالم لو هيبطل....
يبقي الباطل هيروح فين ؟؟!
يرجع كل الحق لصاحبه ....
يفرح بيه ويعم الخير ....
والمحروم ابو بخت قليل يبقي كبير
أنا باتمني لكلمة ( بابا ) تسمع كل الكون
لما يقولها الابن العاصي والمغرور
يعرف قيمة أهله وناسه....ولأستاذه
عمره ما يقدر يرفع راسه....
مهما يكون...
شايف فضله..لو كان باشا أو دكتور
نبقى ساعتها..... ف أكبر جنة.....
تبقى حياتنا ... زي ما نحلم ...
أو نتمنى .
إيه تتمنى ؟؟!!
للشاعر // سعيد حسان
ليست هناك تعليقات:
إرسال تعليق