..................
هشام سليم
.............
أنا حر زي الطير
اللي مالوهش عش
دايمن بحب الخير
وبكره كل الغش
أنا ليا وش واحد
أنا عايش وبكرامة
وضميري ف شغلي علامة
وبتمني السلامة
للساكنين ف قصر
والمخنوقين ف عش
أنا صادق ومبكدبش
أحيانا قولي دبش
عن حق أنا مسكتش
ولا عمري مااشهد زور
عايش علي طول ف النور
مفيش عندي مستور
كله وش ف وش
لنميمة مااستحملش
بكره كلمة معلش
مبشيلش ف قلبي ضغينة
ولْغِلي أوام أَفِش
مكروه من الأندال
دايمن حواليا جدال
ولساني طول أميال
بخاف م اللي خلقني
ولا اسيبش اللي بيخنقني
اديله وعلي الدماغ
ولا يسوي عندي صاغ
وف لحظة أجيب الداغ
وأرقّع علي الصداغ
ولا عمري ف يوم ماأكِش
منا حر زي الطير
اللي مالوهش عش
هشام سليم
شاعر الحرافيش
ليست هناك تعليقات:
إرسال تعليق