................
هشام سليم
.................
مالك؟
كنت حموت
طب متموت
ولما عشت عملت إيه؟
فتحت عكا؟
لسعادتك قولّي عرفت سكة
مطحون من يومك
راضع همومك
واتفطمت ع الجراح
اوعي تفكر ف اللي راح
لما ييجي الموت اوعي تخاف
كل شئ ف الموت معروف
متشاف
صلّح قلبك المعطوب
والحق توب
والله الموت معاك حنين
معاك مبيّن
إداك إنذار
غيرك نام وعنده أمل
حيعمل عمل
خدوا الموت بدون إنذار
ولا أعذار
جاي دلوقتي تقول
وكلامك مش معقول
كنت حموت
طب متموت
يعني القيامة ياخويا حتقوم
دول كام يوم عليك بكا
وعنك كام واحد حكا
عايز تموت موت
مش حتغير ف الملكوت
عايز تموت ريّحنا
لو موتك فرحة فرحنا
الدنيا سامعة
آخرتها دمعة
ولحظة سكوت
عايز تموت
طب متموت
هشام سليم
شاعر الحرافيش
ليست هناك تعليقات:
إرسال تعليق