.................
المحجوب بوسبولة
..................
//////+++لمكاحل مقادة+++//////
خيلي خيلي سر نفتاخر
سربة مواتية لكل من جاهر
والراكب عليها ياك حاضر
امحزم بالله داك الحاضر
ظاهرة مقادة كيف سرب لحمام
وانا فيها ياك ما نتلام
وصفوف الخيل تعرف العلام
وعلى شوفتها لا تخمام
لمكاحل مقادة في ليدين
مشثاقة للبارود من فين
تجذب السمع وتسلب العينين
هذا يعمر ما يتسنا
بارود ف السربة مايهنا
سولو جدي سولو حنة
سولو البادية والمغنى
هذو الخيل زينة لرضيتو
م الموحال تقولو نسيتو
ف الحركة رقصتو وغنيتو
ركبة مواتية فارس وفرسان
والنظرة تخلق لطمئنان
والناس تردد اجمل لحان
موروث جدادي من ازمان
لقوام ولباس شلى يوريك
للفرجة لحلوة تديك
مغريبية ف الهم تنسيك
حبك لثبوريدة يغريك
سالبة عيون عشاقها كاملين
ذواقها جايين والغادين
ماناسية احبابها الحاضرين
ومفيقة كل دوك النايمين
جرية والطلقة اموازنة
ومغاربة ويقولو ها حنا
مازال لفراجة غير هنا
سر ربانية هواية وغنى
فرحة وبهجة غير تسنا
وامزين الحركة لفراجة
وحروفها توصلك للحاجة
للي ركب يرتاح يتفاجا
في حفظ الله تقضى حاجة
بقلم صقر الحروف الزجال المحجوب بوسبولة
ليست هناك تعليقات:
إرسال تعليق