ديوان أكاليل الإلكتروني لسفراء القلم

................

رضا الحسيني

...........

السبع بنات .. رواية / رضا الحسيني (الحلقة 5)

_ كل خير ياأمي .. اللي تشوفيه إنتي وأبويا الحاج

_ مبروك ياحكمت ياغالية .. عقبالكم يابنات كلكم

_ وعقبالي أنا كمان ياماما ؟

_ طبعا يافريدة .. ده إنتي قبلهم كمان

_ و وأن نا يا ما ما

_ طبعا ياوزة ياحبيبتي .. وانتي .. عريسك خلاص قرًب يجي

_ ب بج جد يا ما ما بج جد

_ مبروك ياأبلة وزة

_ ها ت تي بو وسة يار رو وح و وز زة

_ ياحاج .. خلاص ياخويا البنت موافقة ..قال إيه اللي تشوفيه إنتي وأبويا الحاج

_ مش برضوا ياحاجة زمان إنتي قلتي كده لأبويا الحاج لماسألك ..

_ أنا عارفة بقى يومها كنت قُلت إيه ياحاج ههههههه

_ نتكلم في التفاصيل ياأبو وديع

_ تفاصيل إيه ياحاج .. بنتكم بنتنا .. هتعيش معانا لحد ماوديع يقف على رجليه .. هنفرشلها أوضة وديع زي هي ماتشاور وعلى ذوقها طبعا .. وهنغير طقم الصالة بتاعنا عشان يناسب العروسة طبعا

_ ليكم طلبات تانية ياحاجة

_ تعيشي ياأم وديع كلك ذوق ياختي .. ماانتم قولتوها خلاص .. حكمت دي بنتكم .. بس سي وديع ماقالش هيجيب شبكة إيه

_ الشبكة اللي هتقول عليها حكمت ياطنط هجيبهالها

_ نقرا الفاتحة بقى ياحاج

_ وماله ياأبووديع .. نقرا الفاتحة على بركة الله

_ لولولولولولولولوي ههههههههه مبروك ..ألف ألف مبروك ياعروسة

_ ميرسي ياطنط

_ مبروك ياحكمت يابنتي

_ ربنا يخليك ليا ياأبويا وأقدر أفرًحك على طول

_ مبروك ياحبيبة قلب أمك تعالي في حضني ياغالية

_ مبروك ليكي ياأمي ياحبيبتي ربنا يسعدك دايما

_ مبروك ياحكمت.. يارب أقدر أسعدك

_ مبروك ياسي وديع هههههه

_ لولولولولولوي ههههه مبروك ياأبلة حكمت ..

_ مبروك ياروح قلب أبلة .. عقبالك يارب

_ يارب ياأبلة يارب ههههههههههه

_ ل ولو ل ولو ل ولو مب بر بروك يا ح كم مت

_ عقبالك ياوزة ياحبيبتي عن قريب ..

_لولولولولولولوي ...مبروك يا حكمت

_ عقبالك يانهى نفرح بيكي قريب بإذن الله

.. عقبالكم كلكم ياحبايبي

... وقضينا جميعا ليلة في منتهى السعادة حتى بعدما انصرف وديع وأسرته .. وبقينا طوال الليل نغني ونضحك معا .. ورأيت كيف كان أبي سعيدا ونظراته لاتفارقني .. فارتميت في أحضانه وقبًلته كثيرا

_ إيه ده بقى ياسي بابا .. أبلة حكمت هتاخدك مني ولا إيه هههههه

.. كفاية عليها عريسها .. تسيبك ليا بقى

_ ياحبيبة قلب بابا تعالي في حضني إنتي كمان

_ ههههه اتغاظوا .. اتغاظوا

... يااااه .. حاسة قلبي مش قد فرحتي النهاردة ..أخيرا ياكيداهم هتبقي عروسة .. أخيرا فيه راجل قدر يخطي نحية بيتنا ويدق بابنا ويطلبني ..

_ طب وأفرح ليه كده قوي يعني .. ده العادي ..ويحمد ربنا كمان إني وافقت عليه .. هو كان يحلم يعني يتجوز واحدة بجمالي

_ إنتي لسه صاحية يا حكمت

_ أيوة يانهى صاحية

_ طبعا الليلة ليلتك بقى .. ماحدش قدك النهاردة .. عروسة بقى هههه

_ طبعا ياأبلة وست العرايس أبلة حكمت

_ هو انتي لسه صاحية يامفعوصة ياام لسان طويل

_ سيبيها يانهى بحب كلامها قوي

_ شايفة ياأبلة نهى أخلاق العرايس .. ست النهار بتحبني إزاي ههه

_ وأنا مش بحبك ياست فريدة يعني ولا إيه بقى

_ إزاي بقى يانهى بتحبيها طبعا .. بس هي بتحب تهزر معاكي

_ مبروك ياحكمت ياختي ربنا يتملك على خير

_ عقبالك يانهى نفرح بيكي انتي كمان ياست البنات ياقمر

_ إنتي بس ست البنات ياأبلة حكمت ههههههههه

_ شوفي البت اللي عايزة تنضرب برصاصة في لسانها

_ إيه يابنات صاحين ليه لحد دلوقتي

_ هنام خلاص ياأمي

_ صحيني معاكي ياأبلة حكمت نحضن الشمس سوا هههههه

_ حاضر ياقلب حكمت

_ شمس إيه ياحكمت اللي هتحضنوها دي ياختي

_ لوعاوزة ياأبلة نهى تكوني حلوة زي أبلة حكمت اصحي معانا بدري هههه

_ لالالا أصحى بدري ده إيه النوم حلوووووو تصبحو على خير

_ وانتي من أهله يانهى

_ تصبحي على خير ياأبلة كيداهم ههههههههههه

_ تصبحي على أحلى خير ياقلب كيداهم إنتي

... في الصباح كنا على موعد مع النهار الجديد.. أنا وفريدة .. كان هذا هو النهار الأول لروحي وأناعروسة.. كنت أشعر بأن النهار جاء يشاركني فرحتي .. وكأنه صار فستانا لروحي وقلبي وكل شيء بداخلي .. كم تمنيت أن أعيش هذه اللحظات النهارية الجميلة..

- شايفة ياأبلة حكمت النهار طالع إزاي فرحان بيكي هو كمان

- هههههه وإنتي عرفتي منين إنه فرحان بيا

- ماأنا خلاص ياأبلة بقيت تلميذتك .. وبحس زيك بالنهار هههه

- عقبالك ياحبيبتي ماأشوفك كده في نهار أبيض زي ده ..فرحان كده بيكي معانا

- تفتكري ياأبلة .. هكون يومها حلوة كده زيك ؟!

- هتكوني أجمل مني بكتير ياقلب أبلة

إلى اللقاء في الحلقة القادمة 6