ديوان أكاليل الإلكتروني لسفراء القلم

...........

رضوان ضمان عفا الله 

.........

امشات بنت الفقيه و المناجج اتهدمات
******************************

المنجج اعدم حيث جدا مشات
كانت سميتها بنت الفقيه
مناجج العايلة كلها وقفات
حيث بنات اليوم ما تفهم ليه
جدا شلا جلالب نجات
الحايك بالالوان خطوطو تكاميه
تجيب صباغة الصوف وقيات
البوج و بوعروج تساميه
الصوف منتوف و لا دزات
بتيغشت تغسلو و تنقيه
ومن بعد تقرشلو سبولات
المغيزلة و المغزل تغزل بيه
السوسدي تبرمو بالصبيعات
و عود الكبابة كتدور بيه
و تخرج منو شلا كبات
و دك الوتاد اهنا و لهيه
في نهارها التسدية ما تبات
و تسديه بخيوطو تجريه
وحدة تجري و جوج جالسات
و البياض الا دزتي تعطيه
غير دريهمات و لا سكيكرات
عاد توقف المنجج و تبنيه
تحط الوقاقف و الخشبات
الخشب بسدا تلويه و تكسيه
و تشد المنجج بالعفاسات
السدا في المطرك ادور عليه
و تربط النيرة في الكصبات
و تنكض القراصة و تعمر من جيه
و تفتح المنجج بالسدايات
تنج شبورا و عشية تغطيه
تدق بالخلخال شلا مايات
كلام جدا زين كتمول بيه
كلشي راح من نهار توفات
المنجج مات اشكون اعزيه
غرغرو عينيا بهاد الكلمات
اتفكرت امناجج بنت الفقيه

بقلم محبكم النحاتعنه بمنه و كرمه

(ابن مدينة سيدي بنور)