.............
.فاتت سنة...للشاعر رمضان البربري
............
فاتت سنة مش حلوة
حصلتلي فيها كام بلوة
وكل بلوة كات أكبر
وساعتها نسيت الغنوة
الهم فيها كان فدادين
مليانة غبار وطين
لا أخ كان نافع فيها
والصاحب حالة رزين
وصلة الدم بأت مية
والرحم مقطوعة وغيه
حتي الحيطة بأت مايلة
والجهل طال لافندية
ووشوش كئيبة بتتسوح
من كتر الهم بتطوح
والأصيل ملوش مطرح
والدنيا هري ومسرح
فاتت سنة مش عجيبة
واللي قبلها كات غريبة
الحقد والغل زيادة
ومعدش حاجة قريبة
يا سنة روحي مترجعيش
ضيعتي الحر ومهمكيش
الزير إشتريتة وهكسرة
والقلة هكسرها بقشيش
ليست هناك تعليقات:
إرسال تعليق