ديوان أكاليل الإلكتروني لسفراء القلم

........

حسني همام

..........

« الشكر موصول يا حبيبتي »
==================
الشكر موصول يا حبيبتي
لكل حاجة خاصة بيكي
مريتي عليها في دنيتك
وكانت سبب إنك جيتي الدنيا
وحبتيني وحبيتك ونورتي دنيتي
من أول البطن إللي شالتك
لغاية الأرض إللي مشيتي
عليها بخفتك
للأم إللي تعبت كتير ووضعتك
ومن صدرها الحنون ارضعتك واطعمتك
لابوكي على النطفة اللي وضعها وجابتك
وعلى رعايته وحنانه وأمانته في تربيتك
عايز كمان اشكر المكان
إللي شهد مولدك
والزمان إللي فيه
جيتي ونورتي دنيتك
والهوا اللي بتتنفسيه برقتك
والميه اللي بتشربيها
وبتروي بيها زرعتك
عايز اشكر البلد إللي احتوتك
والطبيبة أو الطبيب إللي
أشرف على ولادتك
واللحظة إللي فيها ظهرتي في الدنيا
وبكيتي أول بكا ومعاه نزلت دمعتك
عايز اشكر أول كلمة خرجت من شفتك
وأول حاجة نطق بيها لسانك وخانتك
وأول ضحكة حلوة
ضحكتيها بعفويتك
وأول رد فعل برىء منك
على حاجة زعلتك أو فرحتك
عايز اشكر ربنا إنه أبدع خلقتك
وإنه انعم عليي بنعمتك
عايز..وعايز..وعايز...اشكر أي حاجة
حلوة شهدت مولدك
أو ليها علاقة بيكي
وجبتك الدنيا ليي
تنوريهالي وتسعدي مهجتي
وتبقي أغلى حاجة حصلتلي
في كل حياتي ودنيتي