.................
السيد علي القن
.............
قصيدة
((( اشطب ع الاحزان )))
خد خط ع اللي فات
واشطب ع الاحزان
وابدأ من الاول
ده العمر لو عدي
عمره مايتعوض
خد خط ع اللي فات
وابدأ من الاول
وأكتب بداية السطر
واضحه لأخر الشطر
وآياك تتحول
مهما الزمان غلبك
خانك كده وعذبك
عمره ما ها يطول
خليك عارف سكتك
كمل كمان قصتك
واحكي بقي وطول
وان تاه الطريق منك
ارجع تاني بخطوتك
للسكه م الاول
وخلي قلبك دليلك
يشد أزرك وحيلك
يهديك ويدلك
بأيده هيوصلك
لقلب يستاهلك
واياك تبص وراك
ع حد باع وصلك
نسي حكايته معاك
ونسي كمان اصلك
وأمشي ع مهلك
وامشي ع طبعك
بكره اللي سيبته وراك
يجري و يندهلك
خد خط ع اللي فات
واشطب ع الاحزان
وعليي سقف طموحك
وداوي قلبك جروحك
وابدأ من الاول
واوعي حاجه توقفك
او حتي تتحول
كلمات الشاعر/السيد علي القن
ليست هناك تعليقات:
إرسال تعليق