ديوان أكاليل الإلكتروني لسفراء القلم

..... ملك محمود الأصفر .....

قصيدة باللهجة العامية ...بعنوان ...
             أيام زمان
.................................................
بتذكر نحنا أطفال
بالكسوة الجامع لكبير
فيو الشيخ حسين سمارة
إمام وكان تقي كتير
ويوم الجمعة يعمل خطبة
ويحث الناس على الخير
والناس كلا كانت أخوة
الغني منها والفقير
............................
وع الشارع كان في محلات
بتعرض لبضاعة للبيع
وبتقصدها كل الناس
بتشتري كل شي بديع
شو بدك بتلاقي فيها
وبتلبيك على السريع
ومشرعة دوم بوابا
بترضي أذواق الجميع
......................
ومن عند حسن الشيخة
كنا نشتري ل قماش
نشتري بوبلين ومنضا
وأجواخ وخامات وشاش
ومن عند حمادة عليا
نشتري كنفا وخيطان
ونشتري كاز ومازوت
سمانة أشكال وألوان
.......................
ومن عند مصطفى الشامي
كنا نشتري الحليب
وسلتة ومبيض غسيل
وشو بدك من عندو تجيب
وبالساحة عباس لخياري
نشتري من عندو زبيب
ومصاص وفستق وبزر
بخمس قروش نعبي الجيب
.....................
أما أحمد أبو الشمس
كان في عندو عصرونية
وأبو بشير الخضراوي
من عندو الخضرة زهية
والإسكافي أبو العوف
بيصلحلنا الأحذية
والحلاق .. كان عيدو الخصا
بيحلق للعالم يومية
......................
وتغيرت الأيام
وتقدمت البشرية
وصار في عنا نادي وسنتر
ومطاعم أكل غربية
والعرس صار بالصالات
والسهرة حتى الصبحية
وصرنا نتباها بالمال
والناس كلا أفندية
............................................
د . ملك محمود الأصفر