................
( خالد فاروق )
...................
( أنا...والزير )
▪︎قومى يا حكومة،فُوق يا وزير؟!!
▪︎ليه إدحْضَر حال الزير؟!!
▪︎قولوا حقيقة مش تزوير
▪︎من غير لت وعجن كتير؟!!
♤مين مسئول عن ذاك الزير؟♤
▪︎جنب الترعة واقف الزير
▪︎من غير عسكر ولَّا غفير
▪︎كل ما اروحله واشرب منه
▪︎ألقى المية تزيد تعكير
♤مين مسئول عن ذاك الزير؟♤
▪︎قالوا سمير جاب جرجير
▪︎وغسل حزمة ف قلب الزير
▪︎ولَّا بهية بتشطف إيدها
▪︎مع منديلها بدون تبرير؟!
♤مين مسئول عن ذاك الزير؟♤
▪︎قالوا ضرورى نشوف البير
▪︎اللى بنملى منه الزير
▪︎بعتوا سفير هُوُّبا يطير
▪︎ويرجع لينا بالتفسير
♤مين مسئول عن ذاك الزير؟♤
▪︎بينى وبينكم سر خطير
▪︎راح اقولهولكم...قولوا "ف بير"
▪︎أصل صراحة الواد دردير
▪︎كان بيبلبط جوه البير
♤مين مسئول عن ذاك الزير؟♤
▪︎يبقى البير محتاج تطهير
▪︎نستعمله من غير تبذير
▪︎أصل الزير والميه حياتنا
▪︎هوه أملنا وحلم كبير
♡أنا مسئول عن ذاك الزير♡
▪︎مش راح أجيب اللوم ع الغير
▪︎هبدأ نفسى بالتغيير
▪︎من غير شكوى ولا تبرير
▪︎هيكون هدفى أكيد تطوير
♡يصلح حالنا وحال الزير♡
عجبى...
( خالد فاروق )
ليست هناك تعليقات:
إرسال تعليق