...................
عاطف عبد الحميد
..............
ليله العيد
....
بطلت ليه الغنا
ع الطبله بالموال ؟
هو السهر غلبك
و تعبت م الترحال؟
يا مسحراتى الهنا
فايت و ساكت ليه؟
قال لى ده بكره الفرح
باين له ألف هلال
....
ليه ف المساجد غفت
تكبيره التراويح ؟
وشموع فانوسنا انطفت
من غير مطر و لا ريح
و الفجر بان مبتسم
وضحك له ألف هلال
لما العيال صحصحوا
من بدري ع المراجيح
.....
زهقت ليه مننا ؟
و بعدت يا رمضان
و احنا الالم هدنا
و معاه حجزنا مكان ؟
ح نحلو بعدك بمين ؟
و مين يحل الكيس
والكون براحه إنكمش
ورجع له ألف شيطان
.....
عاطف عبد الحميد
ليست هناك تعليقات:
إرسال تعليق