ديوان أكاليل الإلكتروني لسفراء القلم

بقلم

الشاعر وليد فتحي

************

صباح تاني ومن تاني
بجرح جديد
صباح الوجع اللي بياكل
في قلب وليد .
صباح الخير
على الصحبه وع اللمه .
صباح من بره
وجوانا مفيش ضلمه .
صباح الخير على الناس اللى سهرانا بدون اسباب .
وناس تانيه سهرانا ف الام وعذاب .
وناس الحيره عيشاها
وناس الغيره قتلاها
وناس تانيه ولا بتهتم
وناس ميهمهاش احباب
وناس بتخبى حقيقتها
ومتشافه كإنه سراب .

صباح الخير على الماضى وع الحاضر .
على الكسبان وع الخاسر .
صباح الخير على الناس اللى شيبها الحب
على ساعه فى اديا
دقاتها بتشبه دق نبض القلب .
صباح الخير
على الضحكه اللى مكسوره
سنين مُره .
على الفرحه اللى مبتكملش
ولا مره .
صباح الخير على عمرى اللى سهانى وضاع منى
علي اللي شايفني دايب فيه
وهو بكيفه بيخوني .
صباح الخير
على غنوه حزينه يوماتى ليلاتى بغنيها
على دنيا عايشها مليش من صغري مكان فيها .
وبرغم احساسى اللى كتبته
برغم كلامى اللى انا قولته .
برغم كتير اوى ف قلبى
بحاول اقولها من قلبى
( صباح الخير 🌹)