................
نذير دهان
.................
العين بصيرة وآه الأيد قصيره
******************************
العين بصيرة والأيد قصيره
من جوعي والله بعت الحصيره
روماتيزم مرضي م النوم ع ارضي
وبين كان وصار ساوونا سيره
******************************
العين بصيرة وولادي جاعوا
بالحاره عني حكوا وذاعوا
الاطبا قالوا فضيان نخاعو
وواقع بعله بشعه وخطيره
*****************************
العين بصيرة وزماني قاسي
لالا مابعتب ع اهلي وناسي
الكل متلي عمال يقاسي
واهل المروة باعت ضميرا
****************************
العين بصيرة ورقابه مافي
ع المصوا دمي وقالوا صافي
التسعيرة تنزل تطلع خرافي
يتلاعبوا فيها ت صرنا بحيره
****************************
العين بصيرة وكلشي غالي
وصرنا سيره بسهر الليالي
جوزا لسميره قللا ع بالي
أقص شعرك ابيع الضفيره
*****************************
الراتب يعلا والسلعه تغلا
واركض ياعمي اللعبه تحلا
تاجر لتاجر يقللو أهلا
أنهب وأسرق وأجمع طميره
******************************
يا امة الله حرام عليكم
كرامه لله أبوس إيديكم
تبكي عيوني تضحك عينيكم
وجوع ساكن بكل ديره
******************************
شعر ؛ نذير دهان
ليست هناك تعليقات:
إرسال تعليق