.......
احمد طلبه
.........
رسايل مخفيه
=========
الرساله السابعه عشر
=============
محبوبتي
بعد السلام
بعد المحبه والموده
وصدقي في وصف الكلام
بعد الغرام
بعد الحنين بعد الأنين
شايفك يوماتي في المنام
شايفك وأنتي بعيده عني
علي بر تاني ومش بطولك
بصرخ ولا حد فاهمني
لكني بدعي الله يصونك
يارب احفظها واحميها
دي غاليه عليا من روحي
يارب اسعدها واعطيها
ولو هي سبب نوحي
لا عمر الحب يتبدل مادام صادق
ومهما الورد كان يدبل
لكنه رمز للعاشق
وحشتيني
ياحب العمر في قلبي عايشه
والحب عمره ماكان حرام
أنتي اللي ولا سامعه وشايفه
هفضل احبك لألف عام
رغم اني ولا شايفك ولمسك
لكني شايفك في المنام
من جوه روحي بحس همسك
رغم الوجع انتي الختام
وحشتيني
=====================
وحشتيني
هتفضل سر جوايا ويعلم ربي انا حالي
ولا انتي بقيتي ويايا ولا اتغير كدا حالي
ويا حالي
انا اللي بعيش مع الأوهام
وأقول دي لسه بقيالي
ويا حالي
انا المجنون مع الأحلام
وانا اللي الدنيا ظلماني
وحشتيني
وإن قالو دا قلبه ضعيف
يقولو لكني مش ههتم
ماانا اللي غرامه بيكي عفيف
ياساكنه جوه جوه الدم
لكن أيدي ولا طايله
وياليلي
انا المجنون وانا اللي بخاف
عليكي يا أغلي شيء فيا
وانا اللي لا عمره منك شاف
في مره أي حنيا
ويا ليلي
يا أغلي من بنات حوا
دموعي كتير كدا سايله
وياليلي
انا اللي لا حول ولا قوه
قصاد غربه سنين مايله
أنا موجوع
ومين هيحس باللي في قلبه نار قايده
وانا المخدوع
مع الدنيا وأوهمها وانا عارف مافيش فايده
لكن صابر وراح أصبر علي الدنيا اللي كرهاني
ماانا اتعودت إن اسهر وأكتبلك كمان تاني
رساله جديده مخفيه
تقول إن انتي وحشاني
رساله حب منسيه
وعارف إنتي نسياني
لكن باقي علي وعدي
راح اكتب ليكي أحزاني
وعارف عمري هيعدي
وبردو لسه وحشاني
ودي رساله ومنسيه
ومخفيه في حرماني
رساله لوحده إنسيه
ومش هعشق خلاص تاني
بروحها ساكنا أه فيا
ورغم دا كله وحشاني
وحشاني
================
احمد طلبه
ليست هناك تعليقات:
إرسال تعليق