...........
أحمد علي الحنش
...........
محظوظ
الدنيا كلها حظوظ
محظوظ
لكه أبنه بالبراد محفوظ
الوجه هو الوجه
والجسم كله جروح ورضوض
ﻻبي نهش طير
وﻻ من چلب معضوض
محظوظ
غيره شهور يدوور
ورجع خايب والگلب مرضوض
ساعه يبسمل
وساعه يحمد
وساعه نسى السنه والفروض
وساعه يتمتم الدنيا حظوظ
ال لكه محظوظ
جاب إبنه بتابوت
يبتسم والكلب مفتوت
يحچي بعالي الصوت
شكد زلم بالبراد شاف
وشكد حصد الموت
وشكد رواح تصعد للسما
وشكد لشاش بالگبور تفوت
وشكد زلم ضاعت
ﻻخبر عنها وﻻ صوت
محظوظ
ال لكه إبنه وجابه بتابوت
جاهز مجمد ومحفوظ
محظوظ
الصار له گبر
وإسمه عالشاهده معروض
محظوظ
وغيره إيتمنى مثل حظه
والدنيا كلها حظوظ
محظوظ. محظوظ….
أحمد علي الحنش
سوريه. الحسكه. 2 /5/2019
ليست هناك تعليقات:
إرسال تعليق