................
إليك غيرت عنوانى
من ديوان / ولسه الفؤاد عطشان
للشاعر / مصطفى فريد
.........
فى قربك نفسى أتهنى
وعينى تحضن الجنه
وانول كل إللى باتمنى
رضاك يا عدل يا حنان
فى عز المحنه باشتاق لك
ورغم ذنوبى بالجأ لك
باحس بروحى تندهلك
وتدعى إليك بألف لسان
عصيت وسترتنى يا عظيم
وجيت وأنت بيا عليم
لقيتك رغم ذنبى رحيم
سقيتنى التوبه بالقرآن
فيك طمعان يارب الكون
بحق الكاف وحق النون
تسامح عبدك المديون
أنا فى عفو الكريم عشمان
أنا العبد الضعيف وفقير
إليك يا صاحب المقادير
حياتى يادوب شهيق وزفير
ونور قرآنك العنوان
وأنا غيرت عنوانى
بإذنك ياللى أهدانى
رضا نفسى وخلانى
أعدى الرحلة بأطمئنان
ليست هناك تعليقات:
إرسال تعليق