ديوان أكاليل الإلكتروني لسفراء القلم

.........

مغاوري كروش

...........

الوشم
*******
مغاوري كروش
القبطان
***********
ماعرفش احدد
فين يكون اصل المكان
ولا أي عصر من العصور
يبقي الزمان
لكن جريمة الاغتيال
المفجعه
هزت كيان
كل الفصول الاربعه
والشمس بتسلك
خيوطها المتعبه
من بين
تعاريج الخريطه المبهمه
والجبل
رغم الشموخ اللي اترسم
فوق جبهته
مابقاش
رواسي أو وتد
مابقاش جريئ
قلبه أسد
حتي الصخور من قبلها
كان قلبها
هين طري
لكن قابيل المفتري
لما استباح
حرمة اخوه
كل الصخور اتحجرت
كل الزهور
اتجردت
اوراقها من توبها الجميل
وانحني من فزعته
جذع النخيل
وادين قابيل الآثمه
كانت تصور وقتها
اول قتيل
دي حكايه يامه
عرفتها
وف وقتها
اولاد قابيل اللي افتروا
لموا الصفات المطلقه
حتي الضماير
والسحن
مافضلش فينا
غير عفن
ودراع في لحمه
بينوشم
وشم الرعاع
والصعلكه
مش دولا هما
اللي انت نمتي
في حضنهم
طب ليه بنرضي بظلمهم
ازاي نعيش
والظلم فيه التهلكه
انا جاي ياأمي استأذنك
فماتفصليش
بينا الرباط
وماتقطعيش بينا الوصال
حاركب حصاني
سكتي
عابر سبيل
لو نار قعادي يحولوها
سلسبيل
او جنه ورث
فأيد ولادي
الجيل ياخدها
بعد جيل
واعفيني يامه
م الكلام
اصل الكلام بينا انتهي
مابقاش يخيل
************

٢٧/ ٢/ ٢٠١٩