ديوان أكاليل الإلكتروني لسفراء القلم

..........

الشاعر/ مغاوري كروش

............

من وحي صراع الحضارات========
قصيدة/ السور والحنطور
بالعاميه المصريه
،،،،،،،،،،،،،،،،،،،،،،،،،،،،،،،
يانص الارض القاعد
مطمن علي باب العش
الفارق بينَّا
مش دم بيجري
ولا حمره علي ملمح وش
ولا شعر مهفهف
او عين تزْرقُّ وتتْلوِّن
علي شاشة دش
ولا غول اتسمي
بالانترنت
عمال بينت ف خبريه
ان كانت بسلامة نيه
أو فيها الغش
الفارق بينا
مش فيلم اثاره يشعللها
او حرب كواكب
او نمل اتصور ف السيما
علي انه عناكب
الفارق
تكويرة ارض بتتشقق
وانقسمت بينا
فبقينا
اغراب عن بعض
يانص الارض المطمن
بالطول والعرض
يانص الارض اللي كاسيها
نهارك
وبترعي ف الزاد والنور
لو بس نهارك يتصالح
مع نفسه ف مره
ويهد السور
يكسينا من زاده ونوره
او حتي يفكر يروينا
اتارينا
باديه وادينا
ف الضلمه الحارقه
بيرمينا
علي شط مايعرفش مجامله
ولا حتي يساعد
ايد نمله
فابنغرز
ونتوه ف الرمله
لو جت زبدايه
من زبد البحر ف ايد موجه
نيتها بتغيت ملهوف
تعزلها الموجه اللي وراها
وتروح سابقاها
وتعوم فوق منها وتعلاها
فتعري المكسي
اللي يرسي
ع الشط الكاتب ع اليافطه
كلمة( محظور )
ويكون الفارق بينا
هواه السور
وانتم ويانا بنتسابق
حواليه وندور
انتم
سايقين الطياره
بمهاره
واحنا بنتحايل
بمراره
ع البغل بتاعنا
اللي كاسفنا
مش راضي
يجر الحنطور
=========

١٨/ ٩/ ٢٠١٨