.................
حمداوي قويدر
......................
من كلام زجال
غنيتو ف دار الميت رقصتو ف جْنازتو
فرحتو للدفينة بالزربة غطيتوه
ما حسيتو بالجرح شفت قلوبكم ماتو
الخير و الطعام ما گر فيكم اللي كيلتوه
مازال تفوت أيامكم كي ايما ذوك اللي فاتو
ما تلقاو اللي يرحمكم كيف ما رحمتوه
عطيتو الريحة زي الجلود ف الصهد باتو
متامر غاملة المخير فيكم ريتو معتوه
الحمير ما كانت للمحرك موحال للعود سبقاتو
و اللي ظنكم فحال راه ظنو خيبتوه
كلاب تهالي الواعر فيهم غير ظلو خلعاتو
دخّلتو الذيب للدوار انتما اللي جبتهوه
ثعالب تعوگ على دجاج الجيران قتاوتو
و الذل تسل للقلوب انتما زرعتوه
حالكم تشتت شملكم ما كان اللي يجمع شتاتو
ما بقى مستور الباقي اللي كان باقي عريتوه
شكون اللي فور طعامكم قولو باش سگّاتو
كسكاس متقوب ما يفور إلى ما قفلتوه
الجاري بلا فايدة هذاك ايامو عياتو
فلايك تميل مع الريح شراعكم قطعتوه
قب الحمّام الفارغ خايبة تزعج بصواتو
صدعتو لينا ريوسنا بالهضرة و شي ما بينتوه
بعتو لينا السراب العين من البعد الما حسباتو
رخاس الغالي ف سوقكم رخيسكم غليتوه
عقنا يالكواليس و التمثيل عرفنا لوحاتو
القصة كاتبها كذاب و دوركم موحال تقنتوه
قبل النهاية قصدكم راه رواحكم اللي فرشاتو
اصلا التمثيل للواقع احاكي كلامي راكم فهمتوه
الناس طوات الكتاب بعد سالات منو وقراتو
عاد جيتو للسناريو تعاودو للخاوي كررتوه
حمداوي قويدر
ليست هناك تعليقات:
إرسال تعليق